Bo shileyning özige artilghan jinayi qilmishlarni inkar qilishi munazire qozghidi

Muxbirimiz méhriban
2013-08-23
Élxet
Pikir
Share
Print
Chungching shehirining sabiq partkom sékrétari, xitay kompartiye siyasiy byuro ezasi bo shiley sotqa tartilmaqta. 2013-Yili 22-awghust, jinen.
Chungching shehirining sabiq partkom sékrétari, xitay kompartiye siyasiy byuro ezasi bo shiley sotqa tartilmaqta. 2013-Yili 22-awghust, jinen.
AFP


Chungching shehirining sabiq partkom sékrétari, xitay kompartiye siyasiy byuro ezasi bo shiley 22 - awghust peyshenbe künidin bashlap shendungning jinen sheherlik ottura sot mehkimiside para élish, xiyanetchilik we hoquqini süy istémal qilish qatarliq jinayetler bilen eyiblinip sotqa tartilghan idi.

Peyshenbe we jüme künliri sotta oqup ötülgen eyibname we guwahliq ispatlirigha qarita, bo shileyning arqa - arqidin étiraz bildürüp, özi üstidiki eyibleshlerni inkar qilishi munazire qozghimaqta.

Bo shiley üstidin échiliwatqan sotta özi heqqidiki eyibleshlerni inkar qildi. Sot esli 23 - awghust ayaqlishidighanliqi belgilen'gen bolsimu, emma 23 - awghust chüshtin kéyin sa'et 5 lergiche bo shiley üstidin höküm chiqirilmidi. Sotchi sotning 24 - awghust shenbe küni dawamlishidighanliqini uqturup sotni toxtatqan.

Nöwette bo shileyning sot jeryanida özi heqqidiki eyibleshlerni inkar qilishi munazire témisigha aylan'ghan bolup, xelq'ara metbu'atlar we xitayning hökümet metbu'atlirida bo shileyning sot meydanidiki pozitsiyisige qarita oxshimighan inkaslar qayturuldi.

Xitayning hökümet metbu'atliridin shinxu'a agéntliqi, merkizi téliwiziye istansisi qatarliqlarning xewiride, bo shileyning sot mehkimiside özi üstidiki eyibleshlerge nispeten "Jahilliq bilen étiraz bildürüp, jinayi qilmishliri heqqide polattek ispat turuqluq,jinayi jawabkarliqni üstige élishtin bash tartishi, aqiwette uninggha paydisiz" ikenliki tekitlinip, bu qétimqi sotning xitay "Kommunist hökümiti hakimiyet tutqan yillarda eyiblen'güchige nispeten eng zor derijide démokratiye hoquqi bérilgen adil sot" bolghanliqi medhiyilendi. Xitayning bashqa hökümet metbu'atlirida bo shiley üstidin échilghan sot heqqidiki xewerler anche köp bérilmidi. Xelq géziti, chungching gézitiqatarliqlarmu shinxu'a agéntliqi bergen xewer we mulahizilerni köchürüp bésish bilen cheklendi.

Xongkong, teywen we köpligen chet'el metbu'atliri bo shileyning sotta özi üstidiki eyibleshlerni inkar qilish pozitsiyisi we buning bo shiley üstidin chiqirilidighan hökümge qandaq tesir körsitishi mumkinliki heqqide türlük perezlerni otturigha qoymaqta. Xongkongda chiqidighan"Shingdaw géziti", "Alma géziti", "Jenubiy xitay seher géziti" qatarliqlarning jüme künidiki xewerliride "Bo shileyning barliq eyibleshlerni qet'iylik bilen inkar qilishi, uning xitayda yuqiri qatlamda wezipe öteshke layiq kishilik xaraktérini körsitidighan" liqi teriplendi. "Alma géziti" ning xewiride yene teywen muxbirining "Bo shiley bu xil jasariti bilen chong quruqluqta öz xahishi boyiche ish qilishta tosalghugha uchraydu, teywen'ge bérip prézidéntliq saylimigha qatnashsa boptiken" dégen sözini neqil élip ishletken.

Chet'el metbu'atlirida bérilgen bo shileyning sotta özi heqqidiki eyibleshlerni inkar qilish pozitsiyesi heqqidiki mulahizilerde, bezi analizchilar bo shileyning bu xil qattiq pozitsiyisi belkim uning üstidin chiqirilidighan jaza hökümini yéniktilishi mumkinlikini ilgiri sürgen bolsa, yene beziler bo shileyning bu xil qattiq pozitsiyisining uninggha paydisiz ikenlikini ilgiri sürmekte. Béyjing bahari zhurnilining bash muherriri, siyasi analizchi xu ping ependi mushu xil qarashtikilerning biri.

Xu ping ependi erkin asiya radi'osida bu heqte toxtilip :"Meyli bo shileyning sottiki pozitsiyisining qandaq bolushidin qet'iynezer, xitay sotining bo shiley üstidin chiqarmaqchi bolghan hökmi özgermeydu. Hazir bo shiley metbu'atlarda "Qet'iylik bilen özini aqlashqa jür'et qildi" dep teriplenmekte. Emma méningche, uning bu xil pozitsiyisi eksiche uning üchün paydisiz aqiwet élip kélishi mumkin. Chünki xitaydiki sot mehkimiliri ezeldin musteqil höküm chiqiralmaydu. Belki xitay kommunist hökümiti ularning qandaq höküm chiqirishi kéreklikini aldin - ala belgilep bergen bolidu" dédi.

Amérika awazining bo shiley üstidin échilghan sot heqqide jüme küni bergen xewiride,"Bo shileyning sotta özi üstidiki eyibleshlerni inkar qilish pozitsiyisidiki qet'iylik yaxshi rol éliwatqan artisni eslitidu" dep teriplinip,sottiki bu xil weziyetning belkim aldin'ala orunlashturulghan bolushi mumkinlikimu ilgiri sürüldi.

Bo shiley üstidin échilghan sotta metbu'atlarning diqqitini tartqan nuqtilarning yene biri, bo shileyning yénida uni yalap turghan ikki neper saqchining oxshash nomurluq iznak taqighanliqi we ularning boyining xitayda igizler qatarigha kiridighan 1.86 Métir igizliktiki bo shileyning boyidin xélila igizliki munazire témisigha aylan'ghan. "Minbaw" gézitining bu heqtiki xewiride "372078 Dégen oxshash nomurluq iznaq taqighan bu ikki saqchining boyi az kem ikki métirgha yéqin" dep teriplinip, xitaydiki tordashlarning ularning kimliki heqqidiki"Ular belkim waqitliq yallan'ghan walibol komandisining ezaliri, yaki artistlar bolushi mumkin" dégen sözliri neqil élinip, xitay da'irilirining "Bo shileyning sotta bekla gewdilinip kétishining aldini élish üchün alghan tedbiri mesxirige uchridi" déyildi.

Bo shiley xitay emeldarliri ichide parixorluq, xiyanetchilik we hoquqini süy'istimal qilish jinayiti bilen eyiblen'gen tunji emeldar emes. Emma bo shiley üstidin échilghan sot shi jingping qatarliq xitayda hakimiyetni ötküzüwalghan yéngi rehberlik dewrige toghra kelgini üchün, bo shiley üstidin qandaq höküm chiqirilishi yenila xitay weziyitini közetküchilerning diqqitini tartiwatqan mesililerning biri dep teriplenmekte.

Toluq bet