Enqerede “2013-Yilida sherqiy türkistan” mawzuluq yighin chaqirildi

Ixtiyariy muxbirimiz erkin tarim
2013.04.02
sulayman-buyukberber-sherqiy-turkistan.jpg Ghazi uniwérsitéti müdüri sulayman büyükberber ependi sherqiy türkistan heqqide söz qilmaqta. 2013-Yili 2-aprél, türkiye.
RFA/Erkin Tarim

Ghazi uniwérsitétining 100-yil zalida “2013-Yilida sherqiy türkistan” mawzuluq yighin chaqirildi. Yawru'asiya tetqiqat uyushmisi uyushturghan bu doklat bérish yighinining échilish nutqini ghazi uniwérsitéti mudiri proféssor doktor sülayman büyükberber ependi qildi.

Arqidin ghazi uniwérsitéti xelq'ara munasiwetler kafédrasining oqutquchisi proféssor doktor xaqan tashdemir riyasetchilik qilghan yighinda d u q ning mu'awin re'isi séyit tümtürk ependi “Sherqiy türkistan dewasining bügünki weziyiti” témisida, hajettepe uniwérsitéti oqutquchisi doktor erkin ekrem bolsa “Sherqiy türkistan dewasining kélechiki” témisida doklat berdi.

Arqidin ghazi uniwérsitéti mudiri proféssor sülayman büyükberber ependi échilish nutqi qildi. U sözini mundaq bashlidi:
Söyümlük oqughuchilar we oqutquchilar, bizning oqughuchilirimiz rastinila aktip halda dölitimizning milliy siyasitige muwapiq pa'aliyetlerni élip bériwatidu. Buning üchün men oqughuchilirimizni tebrikleymen. Bu yighinni burun bir qétim kéchiktürgen iduq. Buning sewebi éniq. Biz ghazi uniwérsitéti bolush süpitimiz bilen türk dunyasining mesililiri bilen hemdem bolghan bir uniwérsitét. Türk dunyasining mesililirige uniwérsitétimiz alahide ehmiyet béridu. Türk dunyasi heqqide söz sözlesh hoquqi yenila bizde. Biz mesililerni otturigha qoyush uslubimizgha diqqet qilishimiz kérek. Ötkende bu yighinni kéchiktürishimizdiki seweb élan tüpeylidin idi. Élandiki resimler namuwapiq bolghachqa, yighinni kéchiktürgen iduq. Bashqa sewebtin bolushi mumkin emes.

Ghazi uniwérsitéti mudiri sulayman büyükberber ependi sherqiy türkistan mesilisining uniwérsitéti üchün shundaqla özi üchün intayin muhim bir mesile ikenlikini bayan qilip mundaq dédi:
Sherqiy türkistan bizning jénimiz. Sherqiy türkistanliqlar tartqan azab biznimu azablaydu. Men qeyserilik, 1964-yili qeyserige köp sanda Uyghur kélip jaylashqan iken. Ottura anatoliye xelqi sherqiy türkistan mesilisige alahide köngül bölidu. Ular üchün qayghuridu. Men uniwérsitét oqughuchisi waqtimda saz chalattim. Xojali qirghinchiliqidin kéyin saz chélishni tashliwettim. Peqetla ezerbeyjanliq qérindashlirim qirghinchiliqqa uchrisa men köngül échip yürsem qandaq bolidu? dep saz chélishni tashliwetken idim. Hazirghiche sazni qolumgha élipmu baqmidim. Bizning türk dunyasigha bolupmu sherqiy türkistan'gha bolghan muhebbitimiz intayin chongqur.

Yighin axirlashqandin kéyin oqughuchilar doklat bergüchilerdin so'al soridi. So'al-jawab 1 sa'etke yéqin dawamlashti. Bu yighinda sherqiy türkistan mesilisi heqqide tepsiliy melumat bérildi. 2013-Yilida sherqiy türkistan mawzuluq bu doklat bérish yighinigha uniwérsitét rehberliri, oqutquchi-oqughuchilardin bolup 300 etrapida kishi qatnashti.

Biz yighin heqqidiki köz qarashlirini igilesh üchün yighinda doklat bergen d u q mu'awin re'isi séyit tümtürk ependige mikrofonimizni uzattuq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.