Yaponiye axbarati: "Shi jinping hökümiti ju yungkang mesiliside tuxumni tashqa urup qoydi"

Ixtiyariy muxbirimiz haji qutluq qadiri
2014-04-09
Élxet
Pikir
Share
Print
Xitay siyasiy qanun komitéti mu'awin sékrétari ju yungkang béyjingdiki xelq qurultiyida. 2008-Yili 8-mart.
Xitay siyasiy qanun komitéti mu'awin sékrétari ju yungkang béyjingdiki xelq qurultiyida. 2008-Yili 8-mart.
AFP

Yaponiyedin chiqidighan "Minami nippon géziti" ning 4-apréldiki sanida "Ju yungkang özining qilmishidin pütünley téniwaldi" serlewhilik, xitay emeldari ju yungkangning chériklik délosigha a'it maqaliler bésilghan.

Minami nippon gézitining 4-apréldiki xewiride ashkarilinishiche, 71 yashliq xitay emeldari ju yungkang tekshürüsh jeryanida özining parixorluq, xiyanetchiliktin ibaret chériklik qilmishidin téniwalghan we özining bashqilardin pul alghanliqini ret qilip turuwalghan. Xewerde xitay hökümet da'irilirining ju yungkangning chériklik qilmishini kéchikip ashkarilighanliqi we shundaqla uni tekshürüsh xizmitining ötken yili 12-aydin bashlap resmiy ish bashlighanliqi ilgiri sürülgen.

Bu heqtiki xewerde déyilishiche, xitay dölet re'isi shi jinping uni tézrek jinayi jawabkarliqqa tartip jazalashni meqset qilghan bolsimu, lékin u tekshürgüchilerning xizmitige taza masliship bermigenliki üchün uning délosi kéchikip ketken.

Xewerde,xitay hökümet da'iriliri, ju yungkangning tekshürüsh jeryanida özini öltürüwélishqa urun'ghanliqi toghrisida bezi uchurlarni tarqatqanliqinimu tilgha alghan.

Xewerde "Ju yungkang tekshürüsh xizmitige izchil qarshiliq körsitip kelgenliki sewebidin, tekshürüsh guruppisining xizmiti tolimu tesliship ketti. Hökümet qiyin ehwalda qaldi. Ötken yili bo shiley ömürlük qamaq jazasigha höküm qilin'ghan idi. Bo shileymu tekshürüsh jeryanida özining qilmishigha iqrar bolmighanliqi üchün, uning délosi uzun'gha sozulghan idi. Emma bu qétim, merkizi tekshürüsh guruppisi ju yungkangning délosi toghrisida tepsiliy pilan tüzep chiqti. Shi jinping ju yungkangning mesilisidin tézrek xulase chiqirishni oylishiwatqan bolsimu, lékin xitay kompartiyisi merkizi komitéti bu mesile sewebidin kompartiyining inawitining yerge tökülüp kétishidin ensirep, ju yungkang délosidin qandaq xulase chiqirish toghrisida béshi qétip chongqur oylishiwatidu" déyilgen.

Xewerde xitay dölitidin ibaret parixorluq, xiyanetchilik, chériklikke tolup ketken bir döletning, ju yungkangning mesilisi heqqide rastchilliq bilen ashkara xulase chiqirishidin ümid kütkili bolmaydighanliqini körsetken.

Xewerde "Xitay kompartiyisi ju yungkang mesiliside nahayiti éhtiyatchanliq bilen ish körüwatidu. Sewebi xitay kompartiyisi merkizi komitéti da'im ishlar komitétining hey'et ezaliri ichide héchkim bu xildiki chériklik mesilisi körülüp tekshürüsh élip bérilip jazagha tartilip baqmighan. Shunga bu mesile xitay kompartiyisi üchün nahayiti qiyin mesile boluwatidu. Emma, ju yungkangning oghli we uning bir qisim tughqanliri alliqachan qolgha élinip boldi. Bezilerning déyishiche, ju yungkang mesilisining xulasisi alliqachan chiqip boldi. Belkim hökümet pat yéqinda bu mesile toghrisida éghiz échishi mumkin. Emma bu tolimu qiyin gep" déyilgen.

Ziyaritimizni qobul qilghan xitay hakimiyitining ichki weziyiti üstide tetqiqat élip bériwatqan musteqil tetqiqatchi yoshiki ju yungkang mesilisi heqqide toxtilip mundaq dédi:
-Ju yungkang mesilisi xitayning sabiq dölet re'isi jyang zémin'gha, shinjang Uyghur aptonom rayonining sabiq sékrétari wang léchu'en'ge chétishliq chong mesile. Shunga bu mesile yalghuz ju yungkang bilenla axirilashmaydu. Bu, zenjirsiman chériklik mesilisi bolghanliqtin xitay kompartiyisi axirqi hésabta ju yungkangni "Ölüwaldi" dégen bahane bilen ujuqturup mesilini axirilashturushi mumkin.

Mezkur gézitte yene "Shi jinping hökümiti tuxumni tashqa urup qoydi. Belkim kompartiye öz inawitini töküwélishi mumkin" namliq maqalimu bérilgen. Maqalide "Shi jinping bashchiliqidiki hakimiyet siyasiy bohran'gha qarshi turush üchün ju yungkangning mesilisini ching tutmaqta. Eger ular ju yungkangning mesilisini ochuq ashkarilisa xitay kompartiyisining, kompartiye emeldarlirining eyibini körsetken bolidu. Buning bilen teng, xitay kompartiyisi sehnidin chüshüshke toghra kélidu. Ju yungkang mesilisini qandaq axirilashturush mesilisi shi jinping hakimiyitining tuxumni tashqa urghanliqi bilen barawer. Xitayning dölet ichi axbaratlirida ju yungkangning mesilisige a'it xewerler yoq. Peqetla uning uruq-tughqanlirining qolgha élin'ghanliqi heqqidila uchurlar bar. Bezi gézitlerde ju yungkang mesilisi dep élinip uning üstidin tekshürüsh élip bériliwatqanliqi xewer qilin'ghan bolsimu, emma merkez ju yungkang heqqidiki uchurlarning tarqilishini qamal qilmaqta. Xitay kompartiyisining bu yil 3-ayda béyjingda échilghan 12-nöwetlik memliketlik xelq qurultiyidiki muxbirlarni kütüwélish yighinida bash ministir li kéchyang muxbirlardin ju yungkang heqqide so'al sorimasliqni telep qildi. Ötken ayda béyjingdin chiqidighan asasliq gézitlerdin biri bolghan jinxu'a gézitide bu heqte maqale élan qilin'ghanliqi üchün hökümet da'iriliri bu gézitke agahlandurush bérip bu heqte maqale élan qilmasliqini uqturghan. Chet'el metbu'atlirida élan qilin'ghan uchurda ju yungkangning hazirghiche qolgha élin'ghan uruq-tughqanlirining 300 din oshuq ikenliki, uning musadire qilin'ghan mal-mülüki 90 milyard somdin oshuqluqi bildürülgen. Hazir xitay merkizi komitéti ichide ju yungkang mesilisige qarita oxshimighan köz qarashlar mewjut" déyilgen.

Xewerde, ju yungkangning 1942-yili 12-ayda jyangsuda tughulghanliqi, uning béyjing néfit institutini püttürüp 1998-yilghiche xitayning néfit-gaz shirkitide xizmet we wezipilerge qoyulghanliqi shundaqla uning sichüen ölkisining partkom sékrétari, xitay jama'et xewpsizlik ministiri, 2007-yilidin bashlap xitay siyasiy qanun komitétining mes'ulidin ibaret bir qatar emellerni tutqanliqini körsitish bilen birge, 2008-yili 3-ayning 15-künidin bashlap 2013-yili 3-ayning 15-künige qeder xitayning mu'awin dölet re'isi bolghan zéng chingxungning xitay néfit-gaz shirkitining bash diréktori bolghanliqini, ju yungkangning bolsa mu'awin diréktor ikenlikini alahide eskertip, ötken yili 10-ayda ömürlük qamaq jazasigha höküm qilin'ghan bo shiley bilen munasiwitin barliqini körsetken.

Xewerde yene béyjing, shangxey shehirining partkom sékrétarliridin chén shitung we chén lyangyö we shundaqla xitay néfit-gaz bash shikitining bir qisim emeldarliriningmu ilgiri chériklik délosigha chétilip qolgha élin'ghanliqini eslitip ötken.

Awaz ulinishidin tepsilatini anglang.

Toluq bet