"Junggo arzusi" teshwiqati Uyghur aptonom rayonidiki aliy mekteplerni qaplimaqta

Muxbirimiz qutlan
2013-11-21
Élxet
Pikir
Share
Print
Shinjang uniwérsitétining dotsénti, doktor zulhayat isma'il "Junggo arzusi-méning arzuyum" témisida nutuq sözlimekte. 2013-Yili 16-noyabir, ürümchi.
Shinjang uniwérsitétining dotsénti, doktor zulhayat isma'il "Junggo arzusi-méning arzuyum" témisida nutuq sözlimekte. 2013-Yili 16-noyabir, ürümchi.
xjnu.edu.cn diki munasiwetlik maqalidin elinghan

Yéqindin buyan Uyghur aptonom rayonluq teshwiqat organlirining aliy mektep oqughuchiliri arisida "Ménge yuyush" xaraktérlik siyasiy teshwiqatlarni keng kölemde élip bériwatqanliqi melum bolmaqta.

"Junggo arzusi" témisida qanat yaydurulghan bu teshwiqat pa'aliyetliri tengritagh tori, "Shinjang géziti", shinjang radi'o-téléwiziye tori hemde Uyghur aptonom rayonidiki herqaysi aliy mekteplerning tor betliridin keng orun alghan. Közetküchilerning ilgiri sürüshiche, Uyghur élidiki aliy mektepler atmosférasini qaplighan mezkur teshwiqatlar "Tyen'enmén weqesi" yüz bérip rayonning siyasiy weziyiti jiddiyleshken bir peytte otturigha chiqqan.

11-Ayning bashliridin bashlap Uyghur aptonom rayonluq partkom teshwiqat bölümi ma'arip nazariti we ittipaq komitéti arqiliq Uyghur élidiki 19 aliy mektepte yene bir meydan "Ménge yuyush" teshwiqati élip bérishni pilanlighan. Da'iriler idé'ologiye jehettiki bu heriketni omumyüzlük seperwer qilish üchün aldi bilen az sanliq millet serxilliri arisidiki yash siyasiy aktiplarni heriketlendürgen. Ilgiri ürümchidiki melum aliy mektepning teshwiqat ornida uzun yil ishligen, hazir yawropada yashawatqan pezilet xanim bu heqte ziyaritimizni qobul qilip öz qarashlirini bildürdi.

Shinjang ijtima'iy penler akadémiyesi pelsepe tetqiqat institutining bashliqi, tetqiqatchi murat qéniyatning "Tyen'enmén'ge térrorluq hujum qilish délosi shinjangdiki 22 milyon ammining yüzini tökti" serlewhilik maqalisi bu qétimqi siyasiy teshwiqatning bashlanmisi bolghan. Mezkur maqale 5-noyabirdin bashlap, tengritagh tori, "Shinjang géziti", junggo xewerler tori qatarliq hökümet taratqulirida qayta-qayta bésilghan.
Uyghur aptonom rayonluq ma'arip nazariti we ittipaq komitétining biwasite seperwer qilishi bilen 11-ayning béshidin bashlap herqaysi aliy mekteplerde "Ménge yuyush" herikiti bashlan'ghan. Bu heriket 15-we 16-noyabir künliri "Junggo arzusi" témisidiki nutuq sözlesh pa'aliyiti bilen ewjige kötürülgen.

Shinjang uniwérsitéti toridin melum bolushiche, 1-noyabir küni mektep ittipaq komitéti bilen axbarat we tarqitish instituti birlikte "Junggo arzusi-méning arzuyum" namliq mikro filim musabiqisi uyushturghan. 15-Noyabir küni Uyghur aptonom rayonluq partkom teshwiqat bölümi, ma'arip nazariti, ittipaq komitéti, ijtima'iy penler birleshmisi we herqaysi aliy mektepler birlikte shinjang pédagogika uniwérsitétida "Junggo arzusi-méning arzuyum" namliq chong tiptiki teshwiqat herikitining échilish murasimini ötküzgen. "Shinjang ijtima'iy penler sahesidiki yash alimlarning 2013-yilliq muhakime munbiri" nami bérilgen mezkur teshwiqat pa'aliyiti shu küni chüshtin kéyin daghdughiliq bashlan'ghan. Uyghur aptonom rayonidiki 19 aliy mekteptin tallan'ghan 37 siyasiy aktip nutuq sözleshke uyushturulghan. Ikki kün dawamlashqan bu pa'aliyet Uyghur aptonom rayonidiki hökümet taratqulirida keng teshwiq qilin'ghan.

Aptonom rayonning kattiwashliri qatnashqan bu pa'aliyette shinjang uniwérsitétining dotsénti, doktor zulhayat isma'il, shinjang ijtima'iy penler akadémiyisining kandidat aliy tetqiqatchisi zumret ablikim, qeshqer pédagogika institutining léktori güzelnur toxti qatarliq siyasiy aktiplar "Milliy bölgünchilik we qanunsiz diniy pa'aliyetler" ge zerbe bérip, Uyghur studéntlirini "Junggo arzusi" chüsheshke chaqirghan. Doktor zulhayat isma'ilning " Wetenning birlikini qoghdash-her millet xelqining ortaq mes'uliyiti" namliq maqalisi 14-noyabir künila tengritagh torida élan qilinip, herqaysi metbu'atlarda ulap bésilghan. U maqaliside 2009-yilidiki "5-Iyul weqesi" din taki yéqinqi "Tyen'enmén weqesi" giche bolghan jeryanni birmu-bir tilgha élip, bu weqelerning Uyghur xelqining "Junggodiki ammiwi obrazini xunükleshtürgen" liki heqqide jar salghan. Shuning bilen birge "Üch xil küch" ke zerbe bérip, " Junggoning birlikini qoghdash shinjangdiki 22 milyon xelqning, bolupmu Uyghur xelqining mes'uliyiti" ikenlikini ilgiri sürgen.

Pezilet xanim sözide aliy mekteplerning siyasiy sehniside aktip kozir bolup körünüwatqan bu xil kishilerning emeliyette Uyghur yash ziyaliyliri ichidiki "Zamaniwi mangqurtlar" ikenlikini ilgiri sürdi.

Uyghur aptonom rayonidiki herqaysi aliy mektepler partkomi östürüsh obyékti qilin'ghan yash oqutquchilar we siyasiy aktiplarni teshkillep siyasiy léksiye sözlesh pa'aliyitini birqanche yillar burunla yolgha qoyghanliqi melum. "Ménge yuyush" xaraktérlik bu siyasiy teshwiqat pa'aliyetliri her qétim Uyghur élining weziyiti jiddiyleshkende aliy mektep oqughuchilirigha nuqtiliq élip bérilidiken.

Toluq bet