Pakistandiki xitay elchixanisi bir qisim Uyghurlargha qishliq maddiy eshyalarni tarqitip bergen

Ixtiyari muxbirimiz qutluq
2016.11.28
pakistan-chinese-embassy-uyghur Pakistandiki xitay elchixanisi birtürküm sodigerlerge, jümlidin bir türküm Uyghurlargha söz qilmaqta
Photo: RFA

24-Noyabir xitayning pakistan islam'abadtiki elchixanisi pakistandiki bir qisim Uyghurlarni elchixanige chaqirip ulargha qishliq maddiy eshyalarni tarqitip bergen we Uyghur élidin alahide teklip qilin'ghan muqam ansambilining sen'etchilirining sen'et nomurlirini körsetken.

Pakistandiki xitay elchixansining tor bétide körsitilishiche, islam'abaddiki xitay elchixanisi rawalpindi shehiri we gilgit taghliq rayonida olturushluq bir qisim Uyghurlargha  qishliq maddiy eshya buyumlirini tarqitip bergen. Tor bétide déyilishiche, pa'aliyette ürümchidiki muqam ansambilining sen'etchiliri sen'et nomurlirini körsetken.

Xewerde éytilishiche, pa'aliyette xitay elchisi sung wéydung xitay bilen pakistan diplomatik munasiwet ornatqan 65 yildin buyan qolgha keltürgen bir qisim netijiler toghrisida toxtalghan. U shundaqla xitay-pakistan munasiwetliride xitay hökümitining pakistanda yashawatqan Uyghur muhajirlirigha her tereptin izchil köngül bölüp kéliwatqanliqini tekitligen.

Xitay elchisi sung wéydung sözide yene, shi jinping rehberlikidiki xitay kompartiyesining yeni“ Xitay chüshi” istratégiyisining menggü emelge ashidighanliqini bildürüsh bilen birge, pakistandiki Uyghur muhajirlirining köplep xitaygha bérip,  köplep öginip, xitay we Uyghur élining tereqqiyati toghrisida pakistanda teshwiq élip bérish kéreklikini éytqan.

Xewerde bildürülüshiche, pa'aliyet jeryanida  rawalpindi we gilgittiki xitay muhajirlar jem'iyitining re'isiliri we oqughuchilar wekilliri arqa-arqidin sözge chiqip xitay elchixanisigha jümlidin xitay kompartiyesige bolghan özlirining rehmitini bildürgen.

Xewerde pa'aliyetke rawalpindi shehiri we gilgit rayonidiki xitay muhajirlar jem'iyitining teshkilishi bilen 60 yéqin Uyghur muhajirning qatnashqanliqi ilgiri sürülgen bolsimu , biraq pakistandiki bir qisim Uyghur kishilik hoquq pa'aliyetchiliri bu qétimqi pa'aliyetke peqetla 20-30 etrapidiki kishining qatnashqanliqini delilidi.

Biz islamb'adtiki ju énley kochisigha jaylashqan xitay elchixanisgha téléfon qilip bu heqte toluq uchur igilimekchi bolghan bolsaqmu, biraq téléfonimiz jawabsiz qaldi.

Pakistan rawalpindi shehiridiki musteqil Uyghur kishilik hoquq pa'aliyetchisi abduqeyum ziyaritimizni qobul qilip bu heqte toxtaldi.

Hazir shiwétsariyede hijrette yashawatqan, 1986-yilidin 1989-yilighiche pakistandiki xitay elchixanisida 3-derijilik katipliq unwani bilen diplomatiye wezipisi ötigen sabiq diplomat kérem sherif ziyaritimizni qobul qilip, xitay elchixanisining bu xildiki pa'aliyetlerni élip bérishi toghrisida  toxtaldi.

Sabiq diplomat kérem sherif rawalpindi shehiridiki xitay muhajirlar jem'iyitining mes'ulluqini izchil öz üstige élip kéliwatqan rizaxan heqqide toxtaldi.

Ziyaritimizni qobul qilghan gérmaniyede hijrette yashawatqan dunya Uyghur qurultiyining mu'awin re'isi ümid xemit xitay elchixanisining bu pa'aliyitini uzundin buyan chet'ellerde  dawamliship kéliwatqan xitay diplomatiyesdiki aldamchiliq teshwiqat herikitidin biri ikenlikini bildürdi.

Biz axirida mezkur pa'aliyetke qatnashqan rawalpindi xitay muhajirlar jem'iyitining mes'ulliridin biri bolghan abdurehimgha téléfon qilip bu heqte melumat igilimekchi bolghan bolsaqmu, biraq u, téléfonimizni qobul qilmidi.

Melum bolushiche, pakistan islam'abadtiki xitay elchixanisi bir qanche yillardin buyan pakistandiki xitay muhajirlar jem'iyitining hemkarlishishi bilen pakistanda yashawatqan bir qisim Uyghurlargha elchixanida qurban we roza héytlarni tebriklesh we shundaqla xitayning dölet we bahar bayrimini qutuqlash pa'aliyetlirini ötküzüp bérish arqiliq, pakistandiki Uyghurlarni özlirige mayil qilishqa tiriship kelmekte.

Yuqiriqi awaz ulinishidin tepsilatini anglang.

 

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.