Xu ping: Uyghurlarning qarshiliqigha térrorluq qalpiqi kiygüzgen da'iriler xitaylarningkini bu ölchemge salmidi

Muxbirimiz méhriban
2013-11-21
Élxet
Pikir
Share
Print
Tyen'enmén qowuqining rishatkisigha soqulghan aptomobilning köyüwatqan körünüshi. 2013-Yili 28-öktebir, béyjing.
Tyen'enmén qowuqining rishatkisigha soqulghan aptomobilning köyüwatqan körünüshi. 2013-Yili 28-öktebir, béyjing.
EyePress

Xitay hökümitining Uyghurlarning qarshiliq heriketlirini "Zorawan térrorluq hujum qilish weqesi" dep békitip, Uyghurlargha qarita basturushni barghanche kücheytishi xitay weziyitini yéqindin közitip kéliwatqan weziyet analizchilirining diqqitini qozghimaqta.

Chet'ellerdiki xitay démokratliridin "Béyjing bahari" zhurnilining bash muherriri, siyasiy analizchi xu ping ependi bügün radi'omiz ziyaritini qobul qilip,"Xitay hökümitining Uyghurlarning qarshiliq heriketlirige térrorluq qalpiqi kiygüzüshtiki meqsiti, emeliyette Uyghurlarni téximu keng kölemlik basturush meqsitige yétish we bu basturushni xelq'aradiki térrorluqqa qarshi turush herikiti bilen baghlap qanunlashturushqa urunush" dep körsetti.

Xu ping ependi "28-Öktebir tyen'enmin'ge hujum qilish weqesi" we "16-Noyabir maralbéshi sériqbuya weqesi" ni misalgha élip mundaq dédi:
‏-Bu weqeler emeliyette xitay hökümitining Uyghurlar üstidin yürgüzüwatqan qattiq basturush siyasitige narazi bolghan Uyghurlarning "Qarshiliq körsitish herikiti." emma, xitay hökümiti bu xil naraziliqning yüz bérish sewebini izdeshning ornigha, bu xil qarshiliq heriketlirini "Chet'ellerdiki térrorchi küchler teripidin pilanlan'ghan zorawan térrorluq hujum qilish weqesi" dep élan qilip, kommunist hökümetning Uyghurlar üstidin yürgüzüwatqan adaletsiz milliy siyasitige bolghan naraziliq sewebidin yüz bergen qarshiliq heriketlirini térrorluq qalpiqi kiydürüp basturushqa urunuwatidu.

Xu ping ependi xitay hökümitining Uyghurlarning qarshiliq heriketlirini térrorluq heriket dep békitip basturghan bolsimu, emma xitay ölkiliride xitay puqraliri peyda qilghan pichaq bilen yesli balilirigha hujum qilish, bashlan'ghuch mektep oqughuchilirini partlitish, aptobus, magizinlargha partlitish bombiliri qoyush, hökümet binalirini partlitish, weqelirini "Eqlidin azghan, yaki jem'iyettin narazi bolghan kishiler sadir qilghan adettiki jinayi heriket" dep békitiwatqanliqini sélishturup, xitay hökümitining bu xil "Ikki xil ölchem qoyush siyasiti" ni eyiblidi.

Xu ping ependi yene, xitay hökümitining nöwette yürgüzüwatqan milliy siyasitini tenqidlep:
‏-Uyghur rayonida yüz bériwatqan bu xil qarshiliq heriketlirige yerlik hökümet da'irilirining Uyghurlargha qaratqan basturush siyasiti seweb bolghan. Bu peqetla ézilgen, hoquqi depsende qilin'ghan xelqning hökümetke bolghan qarshiliq herikiti. Bu weqelerning térrorluq bilen héchqandaq alaqisi yoq. Hazir biz nöwettiki weziyettin junggo hökümitining Uyghur we tibetler rayonidiki milletler siyasitining meghlubiyetke yüzlen'genlikini körüwatimiz,‏-dédi.

Ziyaritimiz axirida xu ping ependi yene xitay hökümitini agahlandurup :
‏-Eger xitay kommunist hökümiti Uyghurlarning qarshiliq heriketlirini térrorluq qalpiqi kiydürüp mushu xil halette basturushni dawamlashtursa, yéqin zamanda Uyghurlar rayonida özi arzu qilghan muqim weziyet yaritish emes, eksiche téximu köp bolghan qarshiliq heriketlirige duch kélishi we bu xil qarshiliq Uyghur xelqining omumiy xelq qarshiliq herikitige aylinishi mumkin,‏-dédi.

Toluq bet