Түркийәдики сайламға уйғурлар қандақ қарайду?

Ихтиярий мухбиримиз әркин тарим
2014-03-31
Share
turkiye-saylam-uyghur-bilet.JPG Д у қ муавин рәиси сейит түмтүрк түркийә сайлимида биләт ташлимақта.
RFA/Erkin Tarim

Бу нөвәт түркийәдә өткүзүлгән йәрлик сайлам ахирлашти. Сайлам нәтиҗисидин қариғанда, көп йиллардин буян уйғурларни қоллап келиватқан оңчи партийиләр сайламда юқири авазға еришкән. Мутәхәссисләрниң қаришичә бу, түркийәдики уйғур дәваси үчүн яхшилиқниң бешарити икән.

Һаҗитәппә университетиниң дотсенти доктор әркин әкрәмниң билдүрүшичә, түркийәдики уйғурларму уйғур дәвасини қоллап келиватқан партийиләргә аваз бәргән.

Түркийә уйғурлар үчүн муһим бир дөләт чүнки 65 йилдин буян уйғурлар бу дөләттә дәвасини аңлитишқа тиришмақта. Шуңа түркийәдики бу сайлам уйғурлар үчүн зор әһмийәткә игә. Чүнки, түркийәдики шәһәр вә наһийә башлиқлири уйғурларниң өз дәвасини түрк җамаәтчиликигә аңлитишиға земин тәйярлап бериду.

12-Айниң 17-күни 4 министириниң оғлиниң парихорлуқ билән әйиблинип түрмигә ташлиниши билән башланған вәқәләр түркийә ичидә зор давалғушларни пәйда қилған иди. Бундақ бир вәзийәттә башланған сайлам тәшвиқат хизмәтлири 30-чесла сайлам йешиға тошқан 52 милйон түрк пуқрасиниң шәһәр, наһийә вә йеза башлиқлирини сайлап чиқиши билән ахирлашти. Сайламда һакимийәт бешидики адаләт вә тәрәққият партийәси 45%, җумһурийәт хәлқ партийәси 25%, милләтчи һәрикәт партийәси 17% аваз алди. Түркийәдики чоң шәһәрләрдин истанбул, әнқәрә қатарлиқ шәһәрләрдә адаләт вә тәрәққият партийәси намзатлири, измирдә җумһурийәт хәлқ партийәси намзатлири, адана, мәрсингә охшаш шәһәрләрдә милләтчи һәрикәт партийәсиниң намзатлири шәһәр башлиқи болуп сайланди. Бу қетимқи сайламда сайланған 81 шәһәр, көп санда наһийә вә йезиларниң башлиқлири 5 йил вәзипә өтәйду. Ундақта бу қетимқи сайлам уйғурлар үчүн немини ипадиләйду? бу қетимқи сайламниң уйғур дәваси үчүн немә пайдиси бар дегәнгә охшаш соалларға җаваб тепиш үчүн Www.Uyghurnet.Org Тор гезитини чиқириватқан хәмит гөктүрк вә др. Әркин әкрәм әпәндиләр билән сөһбәт елип бардуқ.

Улар һәммә бирдәк бу қетимқи сайламниң уйғур дәваси үчүн хәйрлик сайлам болғанлиқини баян қилишти.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт