Түркийәдә өткүзүлидиған парламент әзаси сайлими вә шәрқий түркистан мәсилиси тоғрисида анализ

Ихтиярий мухбиримиз әркин тарим
2015.04.09
hamut-gokturk-305.jpg Һамут гөктүрк
RFA/Erkin Tarim

Демократийә билән башқурулуватқан дөләтләрдә парламент әзаси сайлими интайин муһим. Мәзкур парламент әзаси сайлимидин кейин һөкүмәт қурулиду, парламент әзалири қанун чиқириду, һөкүмәт мәзкур қанунни иҗра қилиду.

Парламент әзалири қанун мақуллапла қалмастин дунядики мәсилиләрни парламентниң күн тәртипигә елип келип, һөкүмәткә бесим ишлитиду. Уйғур мәсилисиму түркийә парламентида давамлиқ оттуриға қоюлуп келиватқан мәсилиләрдин бири, шуңа 6-айниң 7-күни түркийә өткүзүлидиған омумий сайлам уйғурлар үчүн бәкла муһим.

4-Айниң 7-күни түркийәдики сиясий партийәләр сайламға қатнишидиған парламент әзалири намзатлириниң тизимликини түркийә алий сайлам идарисигә тапшурди. Бу намзатларниң исимлириға қарайдиған болсақ уйғур мәсилисини яхши билидиған, уйғур мәсилисигә көңүл бөлидиған кишиләрниң көплүки диққитимизни тартти.

Биз бу қетимқи сайламдики намзатлар тоғрисида көз қаришини елиш үчүн уйғур хәвәр вә тәтқиқат мәркизи мәсуллиридин һамит гөктүрк әпәнди билән сөһбәт елип бардуқ.

У, бу қетимқи сайламда чоқум сайлиналайдиған намзатлар арисида шәрқий түркистан мәсилисигә көңүл бөлидиған кишиләрдин ислам конферәнсийәси тәшкилатиниң сабиқ баш катипи профессор әкмәләттин иһсаноғлу, түркийә 21-әсир истратегийә институти мудири профессор үмид өздағ, қәйсәри әрҗийәс университети оқутқучиси профессор абдулқадир ювали, сабиқ дөләт министири профессор әхәт әндиҗан қатарлиқ кишиләрниң мәвҗутлуқини, уларниң милләтчи һәрикәт партийәсидин намзат болғанлиқини, булар түркийә парламентиға киргән тәқдирдә шәрқий түркистан мәсилисиниң давамлиқ һалда оттуриға қоюлидиғанлиқини тәкитлиди.

Түркийәдә 1976-йилидики сайламда уйғурларниң рәһбири мәрһум әйса йүсүп алиптекин намзат болған, бу қетим пәрһат қурбан танритағли намзат намзати болған болсиму рәсмий намзатлиққа таллиналмиған, әсәр сақа ханим болса қәйсәридин 7-қатардин намзатлиққа қоюлған.

Көп көрүлгән хәвәрләр
Вәзийәт- мулаһизә
xitayche-xet
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.