Roza ademge séxiyliq bilen merdlikni ögitidighan ibadet

Rozining roza tutquchida séxiyliq we merdlikke oxshighan bezi ésil exlaqlarni yétildürüshide shek yoq. Buningdiki sir shuki, roza jeryanida bay-gaday, re'is-puqra hemmisi achliqning, ussuzluqning derdini oxshash chékidu we oxshash hés qilidu.
Ixtiyariy muxbirimiz ömerjan
2011.08.23
Share on WhatsApp
Share on WhatsApp

Bashqa héchqandaq bir waqitta bular achliq we ussuzluq derdini chékishte barawer bolalmaydu. Chünki baylarning kündilik yémek-ichmekliri waqti-sa'itide teyyarlan'ghan bolidu. Emma yoqlarning her waqit teyyar bolmaydu. Biraq ramzanda hemmisining yémek-ichmiki birla waqitta teyyar bolidu, toqluqni, achliqni birge chékidu. Shunga baylardin ibret alidighanlar bu ayda yoqsullarning, yégili yoq, ichkili yoq, yil boyi yoqluq ichide kün ötküzüwatqanlarning qedrige yétidu-de, ulargha hésdashliq qilish, yardem qilish we yüklirini birge kötürüshtin ibaret insaniy hemkarliqni öginidu.

Yoqsullargha yardem qilishta ibadetning sawabi bar

Meschiti heremning imami su'ud shureyim bu heptidiki jüme xutbiside mundaq dep sözlidi: “Peyghember eleyhissalam, birer rozidarni iptar qildurghan adem uning tutqan rozisining sawabigha oxshash sawabqa érishidu dégen. Bu hedis yoqsullargha yardem qilishning, ularning derdlirige derman bolushning xuddi roza tutqan'gha oxshash sawabliq ish ikenlikini körsitidu. Ramzanda yoqsullarni iptar qildurghan adem shundaq sawabqa érishse, bashqa waqitlarda yoqsullarning hajitini rawa qilghan, yétimlerning béshini silighan adem sawab tapmamdu? elwette tapidu. Bu hedis bizge yardem qilishni ögetmekte. Ramzandin ibaret bu ilahiy mektebte bashqilargha yardem qilishni ögen'gen adem ramzandin kéyin ögen'genlirini tashliwetse, bilgenlirige emel qilmisa bolamdu? méditsina fakultétigha kirip, doxturluqni ögen'gen adem shu ögen'genlirige emel qilmisa, uning doxturluqining kimge paydisi bolidu? alghan bilimi paydisiz qalghan bolmamdu? rozimu shuninggha oxshash bolup, bir ayliq roza tutush jeryanida adetlen'gen we ögen'gen yaxshi ishlirini ömrining axirigha qeder ishqa salalighan ademlerla ghelibe qilidu. Yüsüp eleyhissalam köp roza tutidiken, uning bundaq köp roza tutushining sewebini sorighanlargha, men toq yürüp yoqsullarning hajetlirini hés qilalmay qélishimdin qorqimen dégen iken.”

Bu dunya sinaqlar dunyasi

Meschiti heremning imami shureyim yene mundaq dédi: “Bu hayatliq sepiri bir türlük sinaqlar dunyasi bolup, adem her anda sinaqlargha duch kélip turidu. Allah ta'ala yoqsul bendilirinimu bay qiliwétishke qadir. Bendiliridin yoqsullargha yardem qilishini sorimastinla özi yardem qilishqimu qadir. Emma bu dunya sinaq dunyasi bolghanliqtin, insanlarni sinaydu we shu sinaqlardin salamet ötkenlerni mukapatlaydu. Ramzan éyi sinalghuchilar üchün eng yaxshi pursettur. Bu ayda allah ta'alaning sinaqliridin toluq ötüp uni razi qilghanlar iradisini bushashturmisla, kéyinki sinaqlardinmu salamet ötüp kétidighanlar qataridin bolalaydu. Emma ramzanda nahayiti yaxshi, mömin, musulman, ramzandin kéyinla saxtipez, aldamchi bolup ketkenler sinaqtin ötelmigenlerdur. Ata-anigha qétirqinip, ixlas bilen xizmet qilish, musulmanlarning ghémini yéyish, hajetmenlerning hajetlirini rawa qilish, yétimlerning béshini silash, qoshnilargha yaxshiliq qilish, uruq-tughqanlargha sile-rehim qilish, yaxshi ishlargha yardemlishish qatarliqlarning hemmisi musulmanning yene bir musulman qérindishigha qilishqa tégishlik xizmetliridur. Bu xalisane xizmet emes, belki allah ta'alaning emri bilen belgilen'gen diniy we insaniy xizmetlerdur.”

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.