Хитай һәм уйғур елиниң 2004 - йиллиқ муһит доклати елан қилинди


2005-06-08
Share

5-Июн хәлқара муһит күнини күтүвелиш мунасивити билән , йеқинда хитай муһит асраш баш идариси хитайда 2004 -йилида йүз бәргән тәбиий апәтләр һәмдә муһит мәсилилири һәққидә доклат елан қилди, арқидинла уйғур аптонум районлуқ муһит асраш идарисиму уйғур елиниң 2004 - йиллиқ муһит доклатини елан қилди . Бу доклатлардин, өткән бир йилниң башқа йилларға қариғанда тәбиий апәтләр пәвқуладдә көп йүз бәргән апәтлик бир йил болғанлиқи мәлум.

Хитайда муһит булғиниш мәсилилири йилдин - йилға еғирлашмақта

Хитай дөләтлик муһит асраш идарисиниң елан қилған йиллиқ доклатида көрситилишичә, өткән бир йилда һаваниң булғиниш дәриҗиси омумий җәһәттин алғанда алдинқи йиллардин төвән болған болсиму , әмма ичимлик су мәнбәсиниң булғиниши йәнила юқири болған.

Бу бир йилда, кислаталиқ ямғур көп яққан, йәр асти сүйиниң булғиниши бултурқидин хели юқири дәриҗә ашқан. Деңиз сүйиниң булғинишиму алаһидә көрүнәрлик болған.

яйлақларниң 95٪ идә чекиниш әһвали көрүлгән. Йәни тәкшүрүштин мәлум болушичә, нөвәттә хитайдики яйлақлар йилиға икки милйон гектардин чекинмәктә икән. 2004 - Йили, йәнила пилансиз ечиш, қалаймиқан колашқа охшаш сүний бузғунчилиқлар, яйлақларниң чекинишини йәниму тезләткән.

2004 - Йилида йәнә келиматтики туюқсиз өзгиришләр, қаттиқ ямғур, мөлдүр, томуз иссиқ, қаттиқ соғоққа охшаш бинормал һава өзгиришлири түпәйли келип чиққан тәбиий апәтләрдә терилғу йәрләрниң, вәйранчилиққа учриши 70٪ кә йәткән.

2004 - Йили бир йил ичидә хитай миқясида 5 балдин юқири йәр тәврәш һадисиси 32 қетим йүз бәргән болуп, буниң ичидә 7 бал әтрапида 5 қетим, 6 бал әтрапида 29 қетим қаттиқ йәр тәврәш апити йүз бәргән.

Бултур бир йил ичидә көрүлгән геологийилик тәбиий апәтләр 13 миң 555 қетимға йәткән болуп, апәтләр 734 адәмниң өлүшини, 124 адәмниң йоқап кетишини һәмдә 549 адәмниң ярилинишини кәлтүрүп чиқирип, җәмий 4 милярд 900 милйон юән әтрапида иқтисадий зиян елип кәлгән.

Уйғур елидә тәбиий апәтләр барғанчә көп көрүлмәктә

Әмди, уйғур елиниң бултур бир йилқи тәбиий апәтләр һәққидики йиллиқ доклатиға нәзәр салсақ , бултур бир йилда бир қәдәр кәң даиридә апәт елип кәлгән тәбиий апәтләр 98 қетим йүз бәргән болуп, алдинқи йилидикидин 48 қетим артуқ йүз бәргән. Бу 2004 - йилиниң уйғур ели үчүн апәтлик бир йил болғанлиқини көрситип туриду.

Йәни уйғур елидә өткән йили көрүлгән пәвқуладдә тәбиий апәтләрниң көпинчиси , қар ериш һәмдә ямғур сәвәбидин келип чиққан, кәлкүн һәмдә тағ серилиш апәтлири болуп 85٪ ни игиләйду.

Бултур кәлкүн апәтлири асасән, или дәря вадилиридики шәһәр һәм наһийиләрдә йүз бәргән болуп, бу районларда 88٪ кә йеқин җайлар апәт тәсиригә учриған.

Гәрчә уйғур елидә бултур көп қетим йәр тәврәш һадисилири йүз берип нурғун өйләр өрүлүп , өлүм - йетим әһваллири көрүлгән болсиму, уйғур елиниң бәргән доклатида бу муһим мәзмунлар һәққидә мәлумат берилмигән.

Хитай һәмдә уйғур ели муһит кризисиға дучар болмақта

Хитайниң муһит әһвали һәмдә уйғур елиниң муһитиму хәлқара муһит асраш органлириниң әндишисини қозғиған болуп, 2004 - йили 12 - айда әнгилийә б б с радио телевизийә ширкити мухбири луйиса лим ханим, хитайниң муһит кризисиға дучар болғанлиқи һәққидә мақалә елан қилған иди. Мақалида йәнә хитайниң ғәрбни ечиш һәрикитиниң уйғур ели екологийисини еғир бузғунчилиққа учритип, уйғур елидә түрлүк тәбиий апәтләргә сәвәб болғанлиқи көрситилгән.

Уйғур аптонум районлуқ муһит асраш идарисиниң доклатида, уйғур елиниң бултур бир йилда алдиқни йиллардикидин еғир апәтләргә учриғанлиқи көрситилгән болса , йеқинда уйғур ели метирологийә идарилири 2005 - йилида уйғур ели алдинқи йиллардинқидинму еғир муһит мәсилилири һәм келимат характерлик апәтләргә йүзлиниватқанлиқи һәққидә мәлумат бәрди. (Гүлчеһрә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт