Xitay hem Uyghur élining 2004 - yilliq muhit doklati élan qilindi


2005.06.08
Share on WhatsApp
Share on WhatsApp

5-Iyun xelq'ara muhit künini kütüwélish munasiwiti bilen , yéqinda xitay muhit asrash bash idarisi xitayda 2004 -yilida yüz bergen tebi'iy apetler hemde muhit mesililiri heqqide doklat élan qildi, arqidinla Uyghur aptonum rayonluq muhit asrash idarisimu Uyghur élining 2004 - yilliq muhit doklatini élan qildi . Bu doklatlardin, ötken bir yilning bashqa yillargha qarighanda tebi'iy apetler pewqul'adde köp yüz bergen apetlik bir yil bolghanliqi melum.

Xitayda muhit bulghinish mesililiri yildin - yilgha éghirlashmaqta

Xitay döletlik muhit asrash idarisining élan qilghan yilliq doklatida körsitilishiche, ötken bir yilda hawaning bulghinish derijisi omumiy jehettin alghanda aldinqi yillardin töwen bolghan bolsimu , emma ichimlik su menbesining bulghinishi yenila yuqiri bolghan.

Bu bir yilda, kislataliq yamghur köp yaqqan, yer asti süyining bulghinishi bulturqidin xéli yuqiri derije ashqan. Déngiz süyining bulghinishimu alahide körünerlik bolghan.

Yaylaqlarning 95٪ ide chékinish ehwali körülgen. Yeni tekshürüshtin melum bolushiche, nöwette xitaydiki yaylaqlar yiligha ikki milyon géktardin chékinmekte iken. 2004 - Yili, yenila pilansiz échish, qalaymiqan kolashqa oxshash sün'iy buzghunchiliqlar, yaylaqlarning chékinishini yenimu tézletken.

2004 - Yilida yene kélimattiki tuyuqsiz özgirishler, qattiq yamghur, möldür, tomuz issiq, qattiq soghoqqa oxshash binormal hawa özgirishliri tüpeyli kélip chiqqan tebi'iy apetlerde térilghu yerlerning, weyranchiliqqa uchrishi 70٪ ke yetken.

2004 - Yili bir yil ichide xitay miqyasida 5 baldin yuqiri yer tewresh hadisisi 32 qétim yüz bergen bolup, buning ichide 7 bal etrapida 5 qétim, 6 bal etrapida 29 qétim qattiq yer tewresh apiti yüz bergen.

Bultur bir yil ichide körülgen gé'ologiyilik tebi'iy apetler 13 ming 555 qétimgha yetken bolup, apetler 734 ademning ölüshini, 124 ademning yoqap kétishini hemde 549 ademning yarilinishini keltürüp chiqirip, jem'iy 4 milyard 900 milyon yu'en etrapida iqtisadiy ziyan élip kelgen.

Uyghur élide tebi'iy apetler barghanche köp körülmekte

Emdi, Uyghur élining bultur bir yilqi tebi'iy apetler heqqidiki yilliq doklatigha nezer salsaq , bultur bir yilda bir qeder keng da'iride apet élip kelgen tebi'iy apetler 98 qétim yüz bergen bolup, aldinqi yilidikidin 48 qétim artuq yüz bergen. Bu 2004 - yilining Uyghur éli üchün apetlik bir yil bolghanliqini körsitip turidu.

Yeni Uyghur élide ötken yili körülgen pewqul'adde tebi'iy apetlerning köpinchisi , qar érish hemde yamghur sewebidin kélip chiqqan, kelkün hemde tagh sérilish apetliri bolup 85٪ ni igileydu.

Bultur kelkün apetliri asasen, ili derya wadiliridiki sheher hem nahiyilerde yüz bergen bolup, bu rayonlarda 88٪ ke yéqin jaylar apet tesirige uchrighan.

Gerche Uyghur élide bultur köp qétim yer tewresh hadisiliri yüz bérip nurghun öyler örülüp , ölüm - yétim ehwalliri körülgen bolsimu, Uyghur élining bergen doklatida bu muhim mezmunlar heqqide melumat bérilmigen.

Xitay hemde Uyghur éli muhit krizisigha duchar bolmaqta

Xitayning muhit ehwali hemde Uyghur élining muhitimu xelqara muhit asrash organlirining endishisini qozghighan bolup, 2004 - yili 12 - ayda en'giliye b b s radi'o téléwiziye shirkiti muxbiri luyisa lim xanim, xitayning muhit krizisigha duchar bolghanliqi heqqide maqale élan qilghan idi. Maqalida yene xitayning gherbni échish herikitining Uyghur éli ékologiyisini éghir buzghunchiliqqa uchritip, Uyghur élide türlük tebi'iy apetlerge seweb bolghanliqi körsitilgen.

Uyghur aptonum rayonluq muhit asrash idarisining doklatida, Uyghur élining bultur bir yilda aldiqni yillardikidin éghir apetlerge uchrighanliqi körsitilgen bolsa , yéqinda Uyghur éli métirologiye idariliri 2005 - yilida Uyghur éli aldinqi yillardinqidinmu éghir muhit mesililiri hem kélimat xaraktérlik apetlerge yüzliniwatqanliqi heqqide melumat berdi. (Gülchéhre)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.