Xizmettiki ayallarning késelge giriptar bolush nisbiti örlimekte

• Muxbirimiz méhribanning bu heqtiki programmisi
• Download story audio

Bundin ilgiri biz , yéqinqi yillardin buyan xitay we Uyghur élidiki ayallar arisida künséri köpiyiwatqan kökrek raki késelliki heqqide melumat bérip, meyli xitay ölkiliride bolsun yaki Uyghur élide bolsun mezkur késelning künséri éghirlishiwatqanliqini we bimarlarning yash jehette barghanséri kichiklep kétiwatqanliqini melum qilghan iduq.

Yéqindin buyan élan qiliniwatqan türlük melumatlarda, xitay we Uyghur élidiki ayallarning, bolupmu xizmettiki ayallarning türlük bésimlar tüpeylidin kökrek rakidin bashqa yene herxil ayallar késelliklirige giriptar boluwatqanliqi melum bolmaqta.

Mesilen, yéqinda béyjingdiki 60 minggha yéqin xizmettiki ayallar arisida élip bérilghan tekshürüshtin melum bolushiche,٪ 93 ayalning salametlikidin chataq chiqqan. Yeni 20 minggha yéqin ayal kökrek rak késellikige giriptar bolghan, qalghanlirida bolsa herxil ayallar késelliki bayqalghan.

Uyghur élidiki ayallarning salametlik mesilisi

Biz Uyghur élidiki ayallarning salametlik mesilisi heqqide, ürümchidiki sehiye orunliri we doxturxanilargha téléfon qilip, ehwal igilimekchi bolduq. Ziyaritimizni qobul qilghan méditsina uniwérsitéti 1 - tarmaq doxturxanisining ayallar bölümi doxturi, Uyghur élidiki ayallarda köp uchraydighan késeller heqqide toxtilip mundaq dédi:

"Biz bu heqte éniq bir sanliq melumat bérelmeymiz. Lékin buyerde ayallar késili bekla köpiyip ketti hemde késel da'irisimu ilgirikidin kéngeydi . Mesilen jinsiy yol yallughi, baliyatqu yallughi, süt bézi yallughi, tuxumdan yallughi, das boshluqi yallughi, baliyatqu ösme kisili, tuxumdan raki, kökrek raki we baliyatqu raki qatarliqlar bekla köpiyip ketti. Bulardin bashqa yene türlük jinsiy késelliklermu künséri köpüyüp, ayallarning hayatigha zor tesir yetküzmekte ".

Ziyaritimizni qobul qilghan bu doxtur hazir Uyghur élidiki ayallar arisida dawalash ünümi eng nachar bolghan tuxumdan yallughi heqqide toxtilip mundaq dédi :

"Hazir dégendek yaxshi we ünümlük dorilar bolmighachqa, tuxumdan yallughini dawalash bekla tes boliwatidu. Chünki bu késelni bayqash nahayiti qiyin, dawamliq ottura yaki axirqi basquchta andin bilgili bolidu. Mezkur késelge giriptar bolghan ayallar köp bolsa aran bir- ikki yil ömür köreleydu. Buninggha sélishturghanda, baliyatqu rakini bayqash xélila asan bolup, uni bayqighan zaman derhal dawalisa, yenila uzun ömür köreleydu".

Ayallarda köp uchraydighan bu késelliklerning kélip chiqishidiki sewebler

Söhbet jeryanida, bu doxtur Uyghur élidiki ayallarda köp uchraydighan bu késelliklerning kélip chiqishidiki sewebler heqqide toxtilip mundaq dédi:

"Menche bu xil késel ayallarda boliwatqan xizmet bésimi qatarliqlarning künséri éghirlap kétiwatqanliqidin we buxil sewebdin ayallarning ichki ajratma séstémisining qalaymiqanliship kétiwatqanliqidin kélip chiqqan . Buningdin bashqa yene memlikitimizde yürgüzülüwatqan pilanliq tughut siyasitimu bir qisim ayallar kisilining peyda bolishigha sewepchi bolup qaldi. Mesilen, ayallarning qosaqtiki balini dawamliq mejburiy chüshüriwétishi, bala almasliq üchün üzük sélishi qatarliqlarning hemmisi nurghun késelliklerning peyda bolushigha sewebchi bolidu" .

Sut qayturush okulimu asanla kökrek rakini peyda qilididiken

Biz bundin ilgiri Uyghur élidiki ösme késellikler doxturxanisigha téléfon qilghanda, mezkur doxturxanida ishleydighan bir Uyghur doxtur hazir Uyghur élidiki ayallarning hemmiside kökrek bézi ösüsh alamiti bar ikenlikini hemde Uyghur ayalliri waqti -waqtida tekshürüp turmighanliqidin, xitay ayallirigha qarighanda téximu asanla kökrek rak késellikige giriptar bolup qalidighanliqini melum qilghan.

Ziyaritimizni qobul qilghan méditsina uniwérsitéti 1 - tarmaq doxturxanisining ayallar bölümi doxturining bildürüshiche, Uyghur élidiki ayallarning kökrek rak késellikige giriptar bolup qélishi, bala almasliq we bala émitmeslik bilenmu nahayiti zich munasiwetlik iken. U yene Uyghur élidiki doxturxanilarda ishlitidighan süt qayturush okulining, ayallarning salametliki üchün intayin ziyanliq ikenlikini tekitlep, bu xil süt qayturush okuli bir xil sitimolin bolghachqa ,u ayallardiki kökrek bézining ösüshini tézlitip, asanla kökrek raki peyda qilidu, dep körsetti. (Méhriban)