Dunyada shéker késili barlar 200 milyondin éship ketti

Buningda késellikning yash cheklimisige uchrimaydighanliqi we heddidin ziyade sémizlik éghir derijilik shéker késilini peyda qilidighanliqi, bashqa yene irsiyet tüpeyli bu xil késelge giriptar bolush nisbiti yuqiri ikenliki melum bolmaqta.

Dunya sehiye teshkilati yene, shéker késilige munasiwetlik ölümlerning 2030‏-yiligha qeder ikki hesse köpiyidighanliqini bildürmekte.

Amérika sehiye birleshmisining tetqiqatchisi doktor ira goldfaynning éytishiche, shéker késili dunyaning hemme yérige tarqalghan xeterlik késellerning biri hésablinidiken. U bu heqte mundaq deydu: “Bu xil késelning sewebini éniq bilishimiz we bu heqtiki tetqiqatlarni yaxshi élip bérishimiz, shu arqiliq heqiqiy türde dawalash yolini tépip chiqishimiz kérek”.

Éghir tiptiki shéker késelliki, bedendiki qan shékirining énérgiyilik aylinishigha tosqunluq körsitip, qanda shéker peyda qilip, ölümge seweb bolidiken. Shunga, shéker késilige giriptar bolghuchilar, qandiki shéker nisbitini dawamliq kontrol qilip turushi intayin muhim bolup, amérika kolombiye uniwérsitétining tébbiy tetqiqatchisi doxtur memet imin ependi, shéker késilige giriptar bolushning asasliq sewebliri hemde bu xil késelge giriptar bolushning aldini élish üchün diqqet qilishqa tégishlik muhim nuqtilar heqqide sözlep berdi.

Shéker késili Uyghurlardimu köp tarqalghan késellik bolup, doxtur memtimin ependi yene, Uyghurlarda bu xil késellikning meydan'gha kélish sewebliri we bu xil késelge giriptar bolghanda némilerge diqqet qilish toghrisida toxtaldi.