Xitayda yéngi tipliq tarqilishchan zukam wirusi tarqalmaqta

Xitayda bu yil yanwardin bashlap, yéngi tipliq tarqilishchan zukamgha giriptar bolghanlar köpeygen, bolupmu chaghan mezgilide bu xil zukam béyjing qatarliq sheherlerde tézlikte tarqilishqa bashlighan.
Muxbirimiz méhriban
2011-02-08
Share
sars-305.jpg Xitayda kishiler sarstin saqlinish üchün maska taqap yürmekte. 2003-Yili 30-mart.
AFP

Nöwette sehiye xadimliri bu xil zukamning sars hem choshqa zukimidin kéyinki yene bir xil ötkür xaraktérlik yuqumluq késel bolushidin ensirimekte iken.

Xewerlerdin melum bolushiche, xitayda bu yil kirgendin buyan tiz sür'ette tarqilishqa bashlighan yuqumluq zukam, nöwette choshqa zukimining yene bir türi bolushi mumkin dep perez qilinmaqta iken.

Melum bolushiche, chaghan mezgilide béyjingdiki doxturxanilargha yuqumluq zukam sewebidin dawalinishqa kelgen késeller sani ziyade köp bolghanliqi üchün, béyjingdiki nurghunlighan doxturxanilar chaghan mezgilidiki dem élishni bikar qilghan.

Béyjing uniwérsitéti qarmiqidiki 1-doxturxanining yuqumluq késeller bölümi doxturi rung doxturning radi'omizgha bildürüshiche, nöwette doxturxanigha yuqumluq zukam sewebidin kelgenlerning 80~90% balnistqa yatquzulghan bolup, doxturxanidiki nechche yüzligen kariwat késeller bilen tolghan iken.

Rung doxtur muxbirgha bu qétim tarqalghan yuqumluq zukam wirusi bilen yuqumlan'ghanlarda körülidighan késellik alametliri heqqide toxtilip, bu xil késel bilen yuqumlan'ghanlarda tuyuqsiz qizish, éghir haldiki nepsi boghulush alametliri bar bolup, buning ilgiri xitayda nurghun ademning ölüshige seweb bolghan sars, choshqa zukimi qatarliqlarning alametliri bilen oxshash boluwatqanliqini bildürgen.

Xongkong, teywen qatarliq jaylardiki sehiye idarilirining bir nechche kündin buyanqi doklatliridin melum bolushiche, bu yil kirgendin buyan xongkong hem teywende jem'iy 18 kishi yéngi tipliq choshqa zukimi sewebidin ölgen, yeni xongkong terepning melumatida bu yil 1-ayning 24-künidin 2-ayning 8-künigiche xongkongda 9 kishi yéngi tipliq choshqa zukimi seweblik ölgenliki xewer qilin'ghan. Teywen terepning melumatida, chaghan mezgilidila 9 kishining yéngi tipliq choshqa zukimi sewebidin ölgenliki békitilgen.

Béyjing sehiye idarisimu 8-féwral seyshenbe küni kechte doklat élan qilip, hazirghiche yéngi tipliq choshqa zukimi bilen ölgenler sanining 4 neper ikenlikini bildürgen. Sehiye idarisining doklatida bu qétim tarqiliwatqan yéngi tiptiki zukam wirusi bilen yuqumlan'ghanlarda qizish, yötilish, nepsi boghulush qatarliq késel alametliri körülgenliki ilgiri sürülüp, ötken aydin buyan béyjing shehiride 160 mingdin köp kishining doxturxanigha zukam sewebidin tekshürtüsh üchün kelgenlikini, ularning 6000 nepirige yuqumluq zukam dep di'agnoz qoyulup, 195 kishining yéngi tipliq choshqa zukimi bilen yuqumlan'ghan dep muqimlashturulghanliqini ilgiri sürgen.

Xitay xewerliridin melum bolushiche, nöwette bu xil yéngi tipliq choshqa zukimining pütün xitaygha tarqilish éhtimali mölcherlenmekte iken. Xitay sehiye ministiri 8-féwral seyshenbe küni jaylargha uqturush chiqirip, yéngi tipliq choshqa zukimining tézlikte tarqilishining aldini élish üchün, xitaydiki herqaysi ölke, sheherlerde, choshqa zukimi waksinisi emleshni dawamliq kéngeytishni telep qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.