Уйғур деһқанлири зәһәрлик чекимлик мәсилиси һәққидә тохталди

• Мухбиримиз меһрибанниң бу һәқтики мәлумати
• Download story audio

Үрүмчи шәһәрлик җамаәт хәвипсизлик идариси мәҗбурий зәһәр ташлатқузуш орниниң мәлум қилишичә, һазир уйғур елидики зәһәрлик чекимлик чәккүчиләрниң көп сандикиси 18 яштин 35 яшқичә болған яшлар болуп, яшлишиш нисбити интайин еғир икән.

Үрүмчи шәһәрлик җамаәт хәвәпсизлик идариси мәҗбурий зәһәр ташлаш орниниң билдүрүшичә, мәзкур зәһәр ташлаш мәркизи қурулған дәсләпки мәзгилидә зәһәрлик чекимлик чәккүчидин 650 ки йиғивелинған болса, кейин барғансери көпийип, һәтта бир күндә йиғивелинған зәһәрлик чекимлик чәккүчиләр 1200 дин ешип кәткән әһвалларму көрүлгән. Демәк һазир уйғур елидә зәһәрлик чекимлик мәсилиси илгирикидин техиму еғирлишишқа башлиған. Зәһәрлик чекимлик мәсилиси пәқәт шәһәрләрдила әмәс, бәлки йеза районлиридиму еғир дәриҗидә мәвҗут болуп турмақта.

Йеқинда хитай агентлиқи тәрипидин берилгән санлиқ мәлуматларда көрситилишичә, хитайдики зәһәрлик чекимлик чәккүчиләрниң 30 % ни деһқанлар игилигән һәмдә зәһәрлик чекимликкә бериливатқан деһқанларниң сани илгирикидин хелила көпәйгән. Мунасивәтлик хәвәрләрдин мәлум болушичә, һазир уйғур елиниң үрүмчи, турпан вә ғулҗа қатарлиқ җайлиридики йезиларда, зәһәрлик чекимлик мәсилиси бир қәдәр еғирлишишқа башлиған.

Бу һәқтә радиомизниң зияритини қобул қилған ғулҗа райониниң ноғайту йезисидики бир деһқан аял мәзкур йезида һазир ишсиз, бикар йүрүп зәһәрлик чекимликкә берилгән яшларниң барғансери көпийиватқанлиқини һәмдә зәһәрлик чекимлик түпәйлидин әйдиз кесилигә гириптар болғучиларниңму илгирикидин җиқийиватқанлиқини билдүрди.