Uyghur déhqanliri zeherlik chékimlik mesilisi heqqide toxtaldi

• Muxbirimiz méhribanning bu heqtiki melumati
• Download story audio

Ürümchi sheherlik jama'et xewipsizlik idarisi mejburiy zeher tashlatquzush ornining melum qilishiche, hazir Uyghur élidiki zeherlik chékimlik chekküchilerning köp sandikisi 18 yashtin 35 yashqiche bolghan yashlar bolup, yashlishish nisbiti intayin éghir iken.

Ürümchi sheherlik jama'et xewepsizlik idarisi mejburiy zeher tashlash ornining bildürüshiche, mezkur zeher tashlash merkizi qurulghan deslepki mezgilide zeherlik chékimlik chekküchidin 650 ki yighiwélin'ghan bolsa, kéyin barghanséri köpiyip, hetta bir künde yighiwélin'ghan zeherlik chékimlik chekküchiler 1200 din éship ketken ehwallarmu körülgen. Démek hazir Uyghur élide zeherlik chékimlik mesilisi ilgirikidin téximu éghirlishishqa bashlighan. Zeherlik chékimlik mesilisi peqet sheherlerdila emes, belki yéza rayonliridimu éghir derijide mewjut bolup turmaqta.

Yéqinda xitay agéntliqi teripidin bérilgen sanliq melumatlarda körsitilishiche, xitaydiki zeherlik chékimlik chekküchilerning 30 % ni déhqanlar igiligen hemde zeherlik chékimlikke bériliwatqan déhqanlarning sani ilgirikidin xélila köpeygen. Munasiwetlik xewerlerdin melum bolushiche, hazir Uyghur élining ürümchi, turpan we ghulja qatarliq jayliridiki yézilarda, zeherlik chékimlik mesilisi bir qeder éghirlishishqa bashlighan.

Bu heqte radi'omizning ziyaritini qobul qilghan ghulja rayonining noghaytu yézisidiki bir déhqan ayal mezkur yézida hazir ishsiz, bikar yürüp zeherlik chékimlikke bérilgen yashlarning barghanséri köpiyiwatqanliqini hemde zeherlik chékimlik tüpeylidin eydiz késilige giriptar bolghuchilarningmu ilgirikidin jiqiyiwatqanliqini bildürdi.