Сәуди әрәбистанида тонулған имам абдурәқип қари һаҗим

• 
  2008-03-13

• Мухбиримиз өмәрҗан тохтиниң бу һәқтики толуқ мәлумати
• Download story audio

Абдурәқип қари һаҗим шаярлиқ абдузаһир дамолламниң оғли болуп, дадиси билән 1936- йили сәуди әрәбистанға келип йәрлишип қалған икән. Абдурәқип һаҗим вәтәндин кичик чиқип, мәккидә оқуп йетилгәнлики вә қуран каримни толуқ ядқа алғанлиқи үчүн әрәб тили униң өз ана тилиға охшаш болуп кәткән болуп,у мәккә мукәррәмә шәһириниң мәсфәлә мәһәллисидики конкарийә мәсчитидә һаятиниң ахириға қәдәр имам вә хәтип болуп өткән.

Әһмәд мөмин әпәнди билән сөһбәт

Сәуди әрәбистаниниң мәккә мукәррәмә шәһиридә турушлуқ әһмәд мөмин әпәнди абдурәқип қари һаҗим һәққидә мундақ деди:"абдурәқип қари һаҗимниң толуқ исми абдурәқип абдузаһир сопи дәймиз. Атиси шаярниң мәшһур өлималиридин икән. Булар дада - бала иккиси сәуди әрәбистанға 1936- йиллири кәлгән икән. юрттин кичик чиққанлиқтин, бу йәрдә әрәб тилини яхши оқуп йетилгән, үстүн мәлуматлиқ киши икән. Абдурәқип қари һаҗим кичик пеил, әхлақлиқ вә тәқвадар киши иди. Мәсчитниң арқисидики кичиккинә ишханисида ана вәтәндин кәлгән һаҗилар билән муңдишип олтуратти. Уларниң дәртлиригә қулақ селип, еһтияҗи бар кишиләргә маддий вә мәниви һәр тәрәптин ярдәм қолини сунатти. Мәккиниң мәшһур мәсҗидлиридин болған бир мәсчиттә бир уйғур имамниң арқисида туруп намаз оқуш вәтәндин кәлгән һаҗилиримиз үчүн бир пәхир иди. Абдурәқип һаҗим рамизан айлирида шу мәсчиттә хәтмә өтәтти."

Абдурәқип қари һаҗимниң паалийәтлири

Әһмәд мөмин әпәнди йәнә мундақ диди:"абдурәқип һаҗим имам вә хатиблиқ қилиш билән бир вақитта мәккә шәһәрлик идарисида бир бөлүмниң башлиқи болуп ишлигән. Кейинки вақитларда 'дуня ислам иттипақи (рабитул ислам)' да бир қанчә йил оттура асия мусулманлириниң хизмитини қилди. Мундин башқа никаһ ишлирини беҗирәтти. Абдурәқип һаҗим 1993- йили алмутуға берип рамизан ейида, алмутиниң мәркизи мәсчитидә мусулманларға тәравиһ намизи оқуп бәргән икән. Һә р йили һәрәмгә кәлгән уйғурлар рамизан ейидин та һәҗ вақтиғичә 4 ай бу кишидин пайдилинатти. Паспорти йүтүп кәткәнләргә паспорт елиш үчүн маңатти, пули йитип кәткәнләргә пул һәл қилип берәтти. Айропилан белити йитип кәткәнләргә беләт елип берәтти. Дини мәлумати йоқларға мәлумат берәтти. Бу адәм сәуди әрәбистандики уйғурлар ичидә динимизға, вәтинимизгә көп хизмәт қилған киши иди. Абдурәқип һаҗимниң җүмә намазлирида оқуған хутбилири топлинип сәуди әрәбистанида уйғур тилида нәшир қилинған."

Абдурәқип қари һаҗимниң вапати

Әһмәд мөмин әпәндиниң ейтишичә, мәрһум 1998- йили авғуст айлирида кесәл сәвәби билән мәккә мукәррәмә шәһириниң шәрқи җәнуп тәрипидики һәрәмгә 6 километир келидиған һиҗрәт мәһәллисидики йеңи өйидә вапат болған икән. Абдурәқип қари һаҗим 6 қиз, 3 оғул, 9 пәрзәнтниң атиси икән. (Өмәрҗан)