“Ötüken sayahetliri” namliq kitab enqerede resmiy neshr qilindi
2012.06.08
Omumiy mezmuni jem'iy töt babdin terkib tapqan 318 betlik bu kitabning birinchi babi Uyghurlar üchün ayrilghan bolup pütün kitabning yüz betke yéqin qismini igileydu. Bu babning bashtiki ikki bétide xitay döliti qisqiche tonushturulghandin kéyin arqidinla sherqiy türkistan tepsiliy tonushturulidu.
Uyghur diyari tonushturghan bu babta aptor “Chüsh dunyasigha seper, majira bashlandi, ürümchi (beshbaliq), xitayche nashtiliqi bizge ziyan qilghudek, dabazani aylinip, boghda köli, teklimakan chöli, turpanda munular, karizlar, yarghol, turpan baziri, sulayman munari we jam'esi, boyluq baghchisi, ming öy buddizm ghari, ürümchidin kashigherge, qolungni ber kashigher, mehmud kashigheriy, héytgah jami'esi, yüsüp xas hajip, afaq xoja, abdulkérim satuq bughra xan, yéngi hésardin yarkenke, kashigherde axirqi kün, Uyghur ta'amliri, ayrilish minutliri keldi, xeyr xosh sherqiy türkistan” qatarliq kichik mawzular astida sherqiy türkistanning hazirqi ijtima'iy, kültür we siyasiy weziyitini kishining qelbini lerzige salidighan bayanlar bilen ipadilep oqurmenlerni xiyal dunyasigha bashlaydu we Uyghur diyarigha bolghan qiziqishini ashuridu. Bu babning axirida bolsa , sherqiy türkistan foto süretliri namliq ayrim bölümde aptor özi tartqan bedi'iy süretler bérilgen bolup bu süretler arqiliq pütkül babning mezmuni oqurmenlerning köz aldida roshen halette namayan bolidu.
“Ötüken sayahatliri” namliq bu sayahet xatirisining bashqa bablirida bolsa mongghuliye, xakasiye, towa, altay we qazaqistan qatarliq rayonlarni sayahet qilish jeryanidiki qaldurghan xatirilirige orun bérilgen . Biz kitab heqqide téximu tepsiliy melumat élish üchün kitabning aptori qadir tosun ependi bilen söhbet élip barduq.