Қазақистан лондон олимпик оюнлирида йәттә алтун медалға еришти

27-Июлда башлинип 16 күнгә созулған мәзкур оюнларға 205 олимпик команда қатнашқан болуп,улар 39 хил тәнһәрикәт түри бойичә күч синашқан иди. Олимпик оюнлириниң йәкүни бойичә биринчи орунни америка қошма штатлириниң тәнһәрикәтчилири 46 алтун, 29 күмүш вә 29 бронза медали билән игиливалди. Иккинчи орунға 38 алтун, 27 күмүш вә 22 бронза медали билән хитай, әмди үчинчи орунға 29 алтун, 16 күмүш вә 19 бронза медали билән бүйүк британийә еришти.

Қазақистан тәнһәрикәтчилири бу қетимда 20 әң күчлүк олимпик команда тәркибидин орун алди. Қазақистан мәмликити һәм шәхсән дөләт президенти нурсултан назарбайеф, шундақла пүткүл қазақистанлиқлар қазақистан олимпик командисиниң утуқлирини юқири баһалиди.

Қазақистан миллий олимпик комитети торида елан қилинған “қазақистанлиқ олимпикчилар 2012-оюнларда омумий һесабта 12-орунни игилиди” намлиқ мақалидә ейтилишичә, мәмликәт тәнһәрикәтчилири 13 медални йеңивалған болуп, униң ичидә александир винокуроф велосипед мусабиқиси, зулфийә чин шәнло, майя манеза, светлана подобедова, илия илиин еғир атлетика, олга рипакова йеник атлетика вә серк сапийеф бокс бойичә алтун медалға еришкән. Әмди күмүш медалға боксчи адилбек ниязимбетоф, бронза медалиға боксчилар марина волнова вә иван дичко, грек-рим челишиши бойичә даниял ғаджийеф, әркин челишиш бойичә ақжҗурек танатароф, челишиш бойичә гүзәл манюровалар мукапатланди.

Мәзкур мақалидә 2012-йил лондон олимпик оюнлириниң мустәқил қазақистан һаятидики унтулмас тарихий вәқә болғанлиқи, омумий медаллар сани бойичә қазақистан өткәнки бейҗиң олимпик оюнлиридиму шундақ көрсәткүчни намайиш қилған болса, бу қетимда дәсләпки қетим аләмниң әң күчлүк мәмликәтлири қатариға киргәнлики оттуриға қоюлған.

Мәлумки, қазақистанда бокс охшаш тәнһәрикәт түригә чоң әһмийәт берилмәктә. Шуниң үчүнму қазақистанлиқлар һәр бир олимпик оюнида боксчилардин көпрәк үмид күтиду. Бүгүнки қазақистан боксчилириниң ичидә серк сапийеф әнә шуларниң бири болуп, у 69 килограмғичә болған салмақта биринчиликни утувалди һәм лондон олимпик оюнлириниң яхши оюнчиси атилип, вел баркер мукапатиға муйәссәр болди. Буниңдин илгири бу мукапат билән қазақистанлиқ боксчилар василий жироф вә бәхтияр артайефлар тәқдирләнгән иди.

“анюс. Кз” тор гезитидә бесилған “бирму олимпик оюни қазақистанлиқ боксчиларниң алтунисиз өтмәйду” дегән мақалидә василий жироф, ермахан ибрайимоф, бекзат саттарханоф, бәхтияр артайеф, бахит сарсекбайеф қатарлиқ боксчиларниң қазақистан шәнини қоғдиған әң ярқин тәнһәрикәтчиләрдин икәнлики алаһидә тәкитләнгән.

Игилишимизчә, қазақистан президенти н. Назарбайеф алтун медалға еришкән тәнһәрикәтчиләрниң һәр қайсиға хәт йоллап, уларни бу ғалибийәт билән сәмимий тәбриклигән.

Боксчи с.Сапийефқа язған хетидә мундақ дейилгән: “лондондики 30-язлиқ олимпик оюнлирида бокс бойичә мусабиқиләрдә алтун медалға еришкәнликиң билән тәбрикләймән! сән өз ғалибийитиң билән вәтәндашлириңға чоң хушаллиқ елип кәлдиң һәм уларға мәмликитимиз үчүн сәмимий ғурур сезимлирини беғишлидиң. Мундақ ярқин ғалибийәтләр яш қазақистанлиқлар үчүн сөздә әмәс, бәлки әмәлийәттә, тәнһәрикәт чоққилириға йолниң даим күндилик вә пидакаранә әмгәк арқилиқ ятидиғанлиқини дәлилләйдиған яхши үлгә болиду. Мустәһкәм саламәтлик, бәхт, шундақла барлиқ ишларда мувәппәқийәтләр тиләймән.”