Namayish uqumi we namayish qilishning ehmiyiti heqqide söhbet

Yéqinda namayish uqumi we namayish qilishning ehmiyiti toghrisida bir maqale élan qilin'ghan bolup, bu maqalini türkiyide yashawatqan Uyghur ziyaliy mirkamil qeshqiri ependi yazghan.
Ixtiyariy muxbirimiz arslan
2012-08-02
Share
Mirkamil-qeshqiriy-305.jpg Sürette: mirkamil qeshqiri ependining yighinda söz qiliwatqan körünüshi. 2012-Yili awghust, türkiye.
RFA/Arslan

Biz bu maqalini chöridigen asasta namayish uqumi we namayish qilishning ehmiyiti toghrisida söhbet élip barduq.

Mirkamil qeshqiri ependi namayish uqumi we namayish qilishning ehmiyiti toghrisida toxtilip mundaq dédi:
‏- Namayish dégen néme? namayish zulumgha we naheqchilikke qarshi towlan'ghan sada, zulum we naheqchilikni esla qobul qilmaydighanliqini élan qilghan jakar. Namayish ajizlar bilen mezlumlargha nisbeten zalim hökümranlarning epti beshirisini échip tashlaydighan, niqabini yirtip, pütün dunyagha sazayi qilidighan eng ötkür qoral. Mustemlikige qarshi namayish bolsa, bir dölet puqralirining mustemlikige qarshi omumyüzlük meydanini belgileydighan we azadliqi üchün her da'im, her qandaq küreshtin yanmaydighanliqini we mustemlikige qet'iy bash egmeydighanliqini namayan qilidighan emeliy küresh. Musteqilliq herikitige tinimsizliq we jushqun keypiyat bexsh étidighan yadroluq amil. Öz nöwitide yene shu millet ezalirining mustemlikige qarshi éngini östüridighan, terbiyilep yétildüridighan eng yaxshi mektep. Insanning her xil xaraktéri orunlashturulghan nérwa sistémisi. Shunga dunyadiki pütün heriketler namayishtin bashlan'ghan. Tarixta namayish bilen bashlanmighan héchqandaq heriket yoq.

Mirkamil qeshqiri ependi namayishqa sel qarap qatnashmaydighanlarni tenqid qilip mundaq dédi:
‏-Bir terepte xitaylar, pitnikeshlerni ishqa sélip namayish qilghanning néme paydisi, konsulgha chiqip warqirap qoyghan'gha ish hel bolamti, dégendek tetür teshwiq tarqitish, chet'eldikilerning wiza resmiyetlirini asanlashturup bérip, weten'ge kirip chiqish tamasigha muptila qilish arqiliq kishilerni namayishqa chiqmaydighan qilishqa, jümlidin " Pütün Uyghurlar razi, naraziliq bildürüsh peqetla töt besh ademning ishi" dégenni ispatlashqa tirishsa, yene bir tereptin chet'ellerdiki xéliy ilghar ziyaliy, teshwiqatchi, ustaz, rehberlermu sel qarap namayishlargha qatnashmay, bir hésabta bilip bilmestin, xitaylarning dépigha usul oynimaqta.

Mirkamil qeshqiri ependi sözide yene namayish qilishning musulmanlar üchün bir ibadet hésablinidighanliqini ilgiri sürüp mundaq dédi:
‏-Eger biz xitaygha qarshi namayishlarni héch bolmighanda qarshiliq körsitish herikiti yaki zulumgha süküt qilmasliq herikiti dep köridighanla bolsaq, u chaghda bizning bu qarishmiz yeni niyitimiz namayishni bir ibadetke we perz eyn qilin'ghan jéhadqa aylandüralaydu, gep bizning namayishqa bolghan tonushimizda, uni zulumgha qarshi turush herikiti yaki qorali dep bilishimiz yaki bilmeslikimizde, eger shundaq tonushqa kélidighanla bolsaq, u chaghdichu?! biz meyli kim uyushturghan bolushidin qet'iynezer choqum qatnishidighan we bir kishilik mejburiyitimni ada qildim dep, xushalliq hés qilalaydighan, chiqmasliqni bolsa, zulumgha qarshi süküt qilish qatarida köridighan bolimiz.

Mirkamil qeshqiri ependi sözide yene, namayish qilishning düshmen'ge qarshi qollinidighan eng ötkür qoral ikenlikini tekitlep mundaq dédi:
‏-Bu heqte peyghember eleyhissalamning "Zulumgha süküt qilghan kishi tilsiz sheytandur" dégen meshhur hedisimu bar. Qisqisi hemmimiz yaxshi bilimiz, chet'elde xitaygha qarshi urush achqili bolidighan urush meydani yoq. Hazirqi dewrde düshmen'ge qaritidighan eng ötkür qoralmu namayishtin ibaret bolup kelmekte..... Misir... Tunis..... Emeliyettimu chet'ellerde biz qilalaydighan, düshmen'ge eng ünümlük ziyan salaydighan herikitimiz we qoralimizmu namayish qilish, lenetlesh, xitayning epte beshirisini échip tashlashtin ibaret. Eger buni qilishtinmu qachsaq, düshmenning közige set körünüp qilishtin, ziyinigha uchrap qilishtin qorqup, goya ulardin kélidighan azabni allaning azabi bilen oxshash orun'gha qoysaq, hemde bu qilmishimizni hékmet tonigha orap danaliqimizning namayendisi qilip körsitishke urunsaq, u chaghda allaning azabini kütmektin bashqa charimiz yoq. Chünki, bu xitayning chet'ellerdiki héle neyrenglirining ishqa éshishini tézlashturup bergenlikimiz bolidu.... Dunyada bundaq mentiqsiz hékmet bolmaydu. Menmu xéyim xeterdin qorqup chiqmisam, bashqisimu chiqmisa, xitayning chet'ellerde qiliwatqan héle neyrengliri köz aldimizda ishqa éship kétiwerse, u chaghda chet'ellerde biz zalim xitaygha qarshi héch ish qilmighan, jümlidin zulumgha qarshi sada yangratmighan bolup qalmamduq, peyghember eleyhissalamning tili boyiche, " Zulumgha süküt qilghan tilsiz sheytan"gha aylan'ghan bolmamduq? ish pütünley tügigen bolmamdu?

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet