Ramizan éyining axirqi 10 künining ehmiyiti toghrisida söhbet

Islam dinida ramizan éyida roza tutush musulmanlar üchün perz qilindi. Roza tutush musulmanlar üchün perz ibadetlerdin biri bolup, islam dinidiki 5 asasiy perz ibadetning biri hésablinidu.
Ixtiyariy muxbirimiz arslan
2012-08-09
Share
Istanbulda-iftar-ziyapiti-305.jpg Uyghurlarning iptar ziyapitidin körünüsh. 2011-Yili 28-awghust, istanbul.
RFA/Arslan

Ramizan éyi musulmanlar üchün ulugh bir ay bolup, bu ayda musulmanlar 30 kün roza tutush bilen ibadet qilish arqiliq özining musulmanliq wezipisini ada qilidu. Bügün yeni 2012-yili 8-ayning 9-küni ramizan éyining axirqi 10 küni yétip keldi. Ramizan éyining axirqi 10 küni ehmiyetlik künler bolup, bu künlerde kéchiliri uxlimay ibadet qilish, itkikapta olturup ibadet qilish, köp qur'an oqush, zikir-tesbih éytish musulmanlar üchün alahide tewsiye qilinidu. Bu arqiliq musulmanlar meniwi dunyasini tazilap imanini küchlendürüp, gunah-me'isyettin yiraq bolushqa türtke bolidu dep qarilidu.Uyghurlarning iptar ziyapitidin körünüsh. 2011-Yili 28-awghust, istanbul.

Ramizan éyi musulmanlar üchün qandaq bir ay? musulmanlar bu ayda qandaq ibadetler bilen meshghul bolidu? ramizan éyining axirqi 10 künining bashqa künlerdin qandaq oxshashmasliq perqi bar? bu so'allarning jawabigha érishish üchün, biz istanbulda yashawatqan Uyghur diniy alimi möminjan bilen söhbet élip barduq.

Möminjan ependi ramizan éyining mubarek bir ay ikenlikini, bu ayda qur'an kerim nazil bolghanliqini, dunyaning yaritilishimu mushu ayda bolghanliqini, bu ayda musulmanlar kündüzi roza tutup, kéchiliri uxlimay ibadet qilish arqiliq özining meniwiyitini paklaydighan bir ay ikenlikini, bu mubarek ayda köplep ibadet qilip, allahqa yéqinchiliq qilish, allahqa du'a qilip arzu tileklirini tilesh kéreklikini bildürdi.

Möminjan ependining bildürüshiche, ramizan éyining axirqi 10 künining bir kéchiside "Qedir kéchisi" dégen ehmiyetlik bir kéchining barliqini, bu kéchide ibadet qilghan kishi 1000 ay yeni 84 yil ibadet qilghanning sawabigha érishidighanliqini, bu heqte qur'an kerimide ochuq ayet bayan qilin'ghanliqini, shuning üchün musulmanlarning bu künlerde kéchilirini uxlimay ibadet qilish arqiliq qedir kéchisige érishish üchün tirishchanliq qilishi kéreklikini ipadilidi.

Allata'ala qur'an kerimide qedir kéchisining ehmiyiti toghrisida toxtilip mundaq dégen: "Qedir kéchisi (sherep we pezilette) 1000 aydin artuqtur". Ming ay yil hésabida 83 yil we 4 aygha toghra kélidu.

Peyghember eleyhissalam qedir kéchisi toghrisida mundaq dégen: "Kimki qedir kéchiside iman bilen we sawab ümid qilghan halda ibadet qilsa, u kishining ilgiriki gunahlirining hemmisi meghpiret qilinidu".

Möminjan ependi sözining axirida, Uyghur musulmanlirining mushu ayda téximu köp du'a qilip zulumdin, ézilishtin qutulushi üchün allahgha du'a qilishini tewsiye qilidighanliqini, chünki mezlumlarning du'asining ijabet bolidighanliqini ilgiri sürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet