Сәуди әрәбистанида "ислам мәзһәплири ара сөһбәт мәркизи" тәсис қилиниду

2012-Йили 15-авғуст күни рамзанниң 27-кечиси сәуди әрәбистаниниң мәккә мукәррә шәһиридә "ислам һәмкарлиқ пәвқуладдә қурултийи" чақирилди.
Ихтиярий мухбиримиз өмәрҗан
2012-08-15
Share
islam-hemkarliq-pewquladde-qurultiyi-305.jpg "ислам һәмкарлиқ пәвқуладдә қурултийи" ниң бәлгиси.
RFA/Omerjan

Қурултай интайин дағдуғилиқ башланған болуп, саваб вә шәрәп җәһәттә миң айдин улуғ болған қәдир кечисиниң мәнивийити қурултайға башқичә мәзмун қошқан. Қурултай мәсчит һәрәмдә таравиһ намизиниң түгиши билән тәң кечә саәт дәл 12 дә башланған.

Қурултай қуран кәримини тилавәт қилиш билән башланған болуп, ечилиш нутқини сәуди әрәбистани падишаһи абдулла сөзлиди. Падишаһ нутқида пүтүн дуня мусулманлирини арилиридики ихтилапларни түгитип бирлик вә инақлиққа, радикаллиққа қарши туруп оттураһаллиққа чақирди.

Падишаһниң нутқи

Падишаһ нутқида мундақ деди: қәдирлик меһманлар! силәрни улуғ һәрәмниң йени вә ислам динимиз барлиққа кәлгән җай болған муқәддәс земинда қизғин қарши алимиз. Иккинчи вәтиниңлар болған сәуди әрәбистан земиниға хош кәпсиләр.

Қәдирлик мусулманлар! ислам үммити бу күнләрдә ихтилапниң, тәприқичиликниң дәрдини тартмақта. Мушу улуғ күнләрдиму мусулман қериндашлиримизниң қиммәтлик қанлири еқитилмақта. Мусулманлар хорланмақта. Буларниң һәммисигә өз-ара инақсизлиқ, тәприқичилик вә питниләр сәвәб болмақта.

Ислам үммитиниң бешиға кәлгән бу чоң мусибәтләрни йеңишниң йоли өз-ара инақлиқ, йол қоюш, динимизға вә мусулманларға зиян йәткүзмәкчи болғанларға қарши бир сәп болуп туруштин ибарәттур. Күчлүкләрла дәвр сүрүватқан мушу дәврдә, ислам үммитимизниң шанлиқ тарихини, иззәт-һөрмитини вә һәқ-һоқуқлирини қоғдишимиз керәк. Биз адаләтни бәрпа қилсақ, һәқсизлиқни вә зулумни йоқ қилалаймиз. Һәр ишта оттураһаллиқни қолға кәлтүрсәк, радикаллиқни йоқ қилалаймиз. Инақсизлиқни йоқ қилсақ, бирликимизни, күч-қудритимизни вә ирадимизни сақлап қалалаймиз.

Қәдирлик меһманлар! мән силәрни мәсулийәтчан болушқа чақиримән. Һәқиқәтни қоғдаш йолида мәсулийәтчан болайли. Аллаһ тааланиң "әгәр силәр алланиң диниға ярдәм қилсаңлар, аллаһ силәргә ярдәм қилиду вә қәдимиңларни мустәһкәм қилиду" дегән сөзини унтумайли. Ахирида силәрни барчә ислам мәзһәплири ара сөһбәт мәркизи тәсис қилишқа чақиримән.

"ислам мәзһәплири ара сөһбәт мәркизи" тәсис қилиниду

Сәуди әрәбистани падишаһи абдулла ибни абдуләзиз қурултай нутқиниң давамида қурултай иштиракчилирини сәуди әрәбистани пайтәхти рияд шәһирини мәркәз қилған "ислам мәзһәплири ара сөһбәт мәркизи" тәсис қилишқа чақирди.

Тәһлилчиләргә көрә, падишаһниң бу тәклипи көңүл бөлүшкә тегишлик алаһидә муһим бир тәклип болуп, мусулманлар мушундақ бирәр мәркәз сайисидә сүнни-шиә, сәләфий-тәсәввуп һәммә бир ариға келип, өз арисидики уқушмаслиқларни һәл қилалайду, өз арисидики инақсизлиқларни йеңип орниға достлуқ билән диний қериндашлиқ риштисини орниталайду. Зади мусулманлар мушундақ бирәр мәркәз астида бир йәргә кәлмисә, уларни бирләштүридиған, мәқсәтлирини чүшәндүрәләйдиған бирәр муәссәсә йоқ. Демәк, падишаһниң бу тәклипи ислам дунясидики әң чоң бир бошлуқни толдурған болди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт