Se'udi erebistanida "Islam mezhepliri ara söhbet merkizi" tesis qilinidu

2012-Yili 15-awghust küni ramzanning 27-kéchisi se'udi erebistanining mekke mukerre shehiride "Islam hemkarliq pewqul'adde qurultiyi" chaqirildi.
Ixtiyariy muxbirimiz ömerjan
2012-08-15
Share
islam-hemkarliq-pewquladde-qurultiyi-305.jpg "Islam hemkarliq pewqul'adde qurultiyi" ning belgisi.
RFA/Omerjan

Qurultay intayin daghdughiliq bashlan'ghan bolup, sawab we sherep jehette ming aydin ulugh bolghan qedir kéchisining meniwiyiti qurultaygha bashqiche mezmun qoshqan. Qurultay meschit heremde tarawih namizining tügishi bilen teng kéche sa'et del 12 de bashlan'ghan.

Qurultay qur'an kerimini tilawet qilish bilen bashlan'ghan bolup, échilish nutqini se'udi erebistani padishahi abdulla sözlidi. Padishah nutqida pütün dunya musulmanlirini ariliridiki ixtilaplarni tügitip birlik we inaqliqqa, radikalliqqa qarshi turup otturahalliqqa chaqirdi.

Padishahning nutqi

Padishah nutqida mundaq dédi: qedirlik méhmanlar! silerni ulugh heremning yéni we islam dinimiz barliqqa kelgen jay bolghan muqeddes zéminda qizghin qarshi alimiz. Ikkinchi wetininglar bolghan se'udi erebistan zéminigha xosh kepsiler.

Qedirlik musulmanlar! islam ümmiti bu künlerde ixtilapning, tepriqichilikning derdini tartmaqta. Mushu ulugh künlerdimu musulman qérindashlirimizning qimmetlik qanliri éqitilmaqta. Musulmanlar xorlanmaqta. Bularning hemmisige öz-ara inaqsizliq, tepriqichilik we pitniler seweb bolmaqta.

Islam ümmitining béshigha kelgen bu chong musibetlerni yéngishning yoli öz-ara inaqliq, yol qoyush, dinimizgha we musulmanlargha ziyan yetküzmekchi bolghanlargha qarshi bir sep bolup turushtin ibarettur. Küchlüklerla dewr sürüwatqan mushu dewrde, islam ümmitimizning shanliq tarixini, izzet-hörmitini we heq-hoquqlirini qoghdishimiz kérek. Biz adaletni berpa qilsaq, heqsizliqni we zulumni yoq qilalaymiz. Her ishta otturahalliqni qolgha keltürsek, radikalliqni yoq qilalaymiz. Inaqsizliqni yoq qilsaq, birlikimizni, küch-qudritimizni we iradimizni saqlap qalalaymiz.

Qedirlik méhmanlar! men silerni mes'uliyetchan bolushqa chaqirimen. Heqiqetni qoghdash yolida mes'uliyetchan bolayli. Allah ta'alaning "Eger siler allaning dinigha yardem qilsanglar, allah silerge yardem qilidu we qediminglarni mustehkem qilidu" dégen sözini untumayli. Axirida silerni barche islam mezhepliri ara söhbet merkizi tesis qilishqa chaqirimen.

"Islam mezhepliri ara söhbet merkizi" tesis qilinidu

Se'udi erebistani padishahi abdulla ibni abdul'eziz qurultay nutqining dawamida qurultay ishtirakchilirini se'udi erebistani paytexti riyad shehirini merkez qilghan "Islam mezhepliri ara söhbet merkizi" tesis qilishqa chaqirdi.

Tehlilchilerge köre, padishahning bu teklipi köngül bölüshke tégishlik alahide muhim bir teklip bolup, musulmanlar mushundaq birer merkez sayiside sünni-shi'e, selefiy-tesewwup hemme bir arigha kélip, öz arisidiki uqushmasliqlarni hel qilalaydu, öz arisidiki inaqsizliqlarni yéngip ornigha dostluq bilen diniy qérindashliq rishtisini ornitalaydu. Zadi musulmanlar mushundaq birer merkez astida bir yerge kelmise, ularni birleshtüridighan, meqsetlirini chüshendüreleydighan birer mu'essese yoq. Démek, padishahning bu teklipi islam dunyasidiki eng chong bir boshluqni toldurghan boldi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet