Сәуди әрәбистанида сүрийигә ярдәм топлаш паалийити башланди

Сәуди әрәбистани падишаһи абдулланиң пәрмани билән сәуди әрәбистаниниң барлиқ шәһәр вә йезилирида сүрийә хәлқи үчүн ярдәм топлаш паалийити башлинип кәтти.
Ихтиярий мухбиримиз өмәрҗан
2012-07-26
Share
seudi-suriyige-yardem-berish-305.jpg Сәуди әрәбистанида сүрийигә ярдәм топлаш паалийити. "иқтисад" гезитидин елинди. 2012-Йили 26-июл.
RFA/Omerjan

Һәммигә мәлумки, сәуди әрәбистан мәмликити пүтүн дуня мусулманлириниң ғемини йәйдиғанлиқи вә қийинчилиқта қалғанларға ярдәм қолини созидиғанлиқи билән тонулған бир мәмликәт болуп, буни һечким инкар қилалмайду.

Мундин илгири пәләстин хәлқи үчүн бир қанчә он йиллардин бири үзүлдүрмәстин ярдәм қилип келиватқанлиқи, һиндонезийигә охшиған тәбиий апәткә учриған дөләтләргә, бенгалға охшиған пеқир дөләтләргә, африқиға охшиған ачарчилиқ йүз бәргән дөләтләргә йиллардин бири һәр йили мубарәк рамзан ейида ярдәм топлаш паалийити елип берилип келиватқанлиқи сәуди әрәбистаниниң хәйр-сахавәттә дуняда әң алдинқи дөләт болуп қалғанлиқини испатлайду.

Өткән йили рамзан ейида сомалиға ярдәм топлаш паалийити елип берилған болса, бу йил рамзанда сүрийә хәлқигә ярдәм топлаш паалийити елип берилмақта. Бу йәрдә ярдәм топлаш паалийити һөкүмәтниң һимайиси астида, һөкүмәт вә хәлқ тәрәптин топлиниду. Падишаһ биринчи болуп ярдәм қилиду. Андин юқири дәриҗилик дөләт адәмлири атиғанлирини тәқдим қилиду. Андин хәлқ өз арисида ярдәм топлашқа башлайду.

Сәуди әрәбистанида чиқидиған гезит вә журналларниң бирдәк тәкитлишичә, сәуди әрәбистанида инсаний ярдәм топлаш иши бу мәмликәтниң адитигә айлинип қалған болуп, 45 йилдин бири һәр йили рамзан ейида, әһвали еғир болған бирәр дөләт хәлқигә ярдәм топлаш адити давам қилмақта икән.

Инсанларға ярдәм қилиш мусулманниң бурчидур

Сәуди әрәбистанида чиқидиған "әл мәдинә" гезитиниң 2012-йили 26-июл күнидики санида, "сүрийә хәлқигә ярдәм топлаш сәпәрвәрлики әвҗигә чиқмақта" дегән темида бир мақалә елан қилинған болуп, мақалидә мундақ дәп йезилған: "қийинчилиқта қалғанларға маддий ярдәм қилиш инсаний әхлақ болғанниң сиртида, мусулманларниң вәзиписи вә адитидур. Пәйғәмбәр әләйһиссалам бир һәдистә: ‹мусулманларниң ишиға көңүл бөлмигәнләр улардин әмәс' дәп көрсәткән. Сәуди әрәбистани ислам дөләтлири ичидә көрүнәрлик вә етибарлиқ бир мәмликәт болуш сүпити билән инсаний ярдәм вә дуняви тинчлиқ ишлирида үлгилик ролини ойнап кәлмәктә. 45 Йилдин бири һәр йили рамзан ейида, қийинчилиқта қалғанларға ярдәм топлаш паалийити давам қилмақта. Һазирғичә топланған ярдәм сани 12 милярд риял(3 милярд доллар)ға йәткән. Сәуди әрәбистан хәлқиму ярдәм қилишқа өгинип кәткән. Һәтта қолида йоқлар кийим-кечәк вә дора-дәрмәклирини болсиму ярдәм қилиштин тартинмиған. Мәсилән, өткән йилидики сомалиға ярдәм топлаш паалийитидә, бир яшанған адәм өзиниң диабит кесили үчүн йәватқан дорисини ярдәм сандуқиға ташлиғанда, мәсулларниң көзлиридин яшлар еқип кәткән иди."

Ярдәм топлаш паалийити давам қилмақта

Сәуди әрәбистанида чиқидиған "оказ" гезитиниң хәвиригә көрә, сәуди әрәбистанида сүрийә хәлқигә ярдәм топлаш паалийити башланған 3 күндин бири топланған нәқ пул сани 175 милйон риял (тәхминән 50 милйон доллар)ға йәткән. Сәуди әрәбистан падишаһи абдулла өз йенидин 20 милйон риял(5.5Милйон доллар) ярдәм қилған. Падишаһ сарийидин кәлгән уқтурушқа көрә, сүрийә хәлқигә ярдәм топлаш паалийити мушу рамзан ейиниң ахириға қәдәр давам қилидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт