Se'udi erebistanida süriyige yardem toplash pa'aliyiti bashlandi

Se'udi erebistani padishahi abdullaning permani bilen se'udi erebistanining barliq sheher we yézilirida süriye xelqi üchün yardem toplash pa'aliyiti bashlinip ketti.
Ixtiyariy muxbirimiz ömerjan
2012-07-26
Share
seudi-suriyige-yardem-berish-305.jpg Se'udi erebistanida süriyige yardem toplash pa'aliyiti. "Iqtisad" gézitidin élindi. 2012-Yili 26-iyul.
RFA/Omerjan

Hemmige melumki, se'udi erebistan memlikiti pütün dunya musulmanlirining ghémini yeydighanliqi we qiyinchiliqta qalghanlargha yardem qolini sozidighanliqi bilen tonulghan bir memliket bolup, buni héchkim inkar qilalmaydu.

Mundin ilgiri pelestin xelqi üchün bir qanche on yillardin biri üzüldürmestin yardem qilip kéliwatqanliqi, hindonéziyige oxshighan tebi'iy apetke uchrighan döletlerge, bén'galgha oxshighan péqir döletlerge, afriqigha oxshighan acharchiliq yüz bergen döletlerge yillardin biri her yili mubarek ramzan éyida yardem toplash pa'aliyiti élip bérilip kéliwatqanliqi se'udi erebistanining xeyr-saxawette dunyada eng aldinqi dölet bolup qalghanliqini ispatlaydu.

Ötken yili ramzan éyida somaligha yardem toplash pa'aliyiti élip bérilghan bolsa, bu yil ramzanda süriye xelqige yardem toplash pa'aliyiti élip bérilmaqta. Bu yerde yardem toplash pa'aliyiti hökümetning himayisi astida, hökümet we xelq tereptin toplinidu. Padishah birinchi bolup yardem qilidu. Andin yuqiri derijilik dölet ademliri atighanlirini teqdim qilidu. Andin xelq öz arisida yardem toplashqa bashlaydu.

Se'udi erebistanida chiqidighan gézit we zhurnallarning birdek tekitlishiche, se'udi erebistanida insaniy yardem toplash ishi bu memliketning aditige aylinip qalghan bolup, 45 yildin biri her yili ramzan éyida, ehwali éghir bolghan birer dölet xelqige yardem toplash aditi dawam qilmaqta iken.

Insanlargha yardem qilish musulmanning burchidur

Se'udi erebistanida chiqidighan "El medine" gézitining 2012-yili 26-iyul künidiki sanida, "Süriye xelqige yardem toplash seperwerliki ewjige chiqmaqta" dégen témida bir maqale élan qilin'ghan bolup, maqalide mundaq dep yézilghan: "Qiyinchiliqta qalghanlargha maddiy yardem qilish insaniy exlaq bolghanning sirtida, musulmanlarning wezipisi we aditidur. Peyghember eleyhissalam bir hediste: 'musulmanlarning ishigha köngül bölmigenler ulardin emes' dep körsetken. Se'udi erebistani islam döletliri ichide körünerlik we étibarliq bir memliket bolush süpiti bilen insaniy yardem we dunyawi tinchliq ishlirida ülgilik rolini oynap kelmekte. 45 Yildin biri her yili ramzan éyida, qiyinchiliqta qalghanlargha yardem toplash pa'aliyiti dawam qilmaqta. Hazirghiche toplan'ghan yardem sani 12 milyard riyal(3 milyard dollar)gha yetken. Se'udi erebistan xelqimu yardem qilishqa öginip ketken. Hetta qolida yoqlar kiyim-kéchek we dora-dermeklirini bolsimu yardem qilishtin tartinmighan. Mesilen, ötken yilidiki somaligha yardem toplash pa'aliyitide, bir yashan'ghan adem özining di'abit késili üchün yewatqan dorisini yardem sanduqigha tashlighanda, mes'ullarning közliridin yashlar éqip ketken idi."

Yardem toplash pa'aliyiti dawam qilmaqta

Se'udi erebistanida chiqidighan "Okaz" gézitining xewirige köre, se'udi erebistanida süriye xelqige yardem toplash pa'aliyiti bashlan'ghan 3 kündin biri toplan'ghan neq pul sani 175 milyon riyal (texminen 50 milyon dollar)gha yetken. Se'udi erebistan padishahi abdulla öz yénidin 20 milyon riyal(5.5Milyon dollar) yardem qilghan. Padishah sariyidin kelgen uqturushqa köre, süriye xelqige yardem toplash pa'aliyiti mushu ramzan éyining axirigha qeder dawam qilidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet