Se'udi erebistanidiki kéchilikte Uyghurlarning ehwali tonushturuldi

Se'udi erebistani dunya musulmanlirining toplishidighan, bir-biri bilen tonushidighan we derd-elemlirige ortaq bolidighan bir ehmiyet jay.
Ixtiyariy muxbirimiz ömerjan
2011.08.18
Seudi-erebistanidiki-kechilikte-uyghurla-ehwali-305.jpg Se'udi erebistanidiki kéchilikte Uyghurlarning ehwali tonushturuldi. 2011-Yili 17-awghust.
RFA/Omerjan

Bolupmu, ramzan we hej aylirida dunyaning her qaysi jayliridin musulmanlar kélip bu yerde uchrishidu. Shu qatarda Uyghurlarmu öz ‏- ara uchrishidu we dunya musulmanlirigha özlirini we ana yurtining ehwalini tonushturushqa tirishidu.

2011-Yili17-awghust kéchisi her yilidikige oxshash se'udi erebistanida igilik tikligen Uyghurlar ichide alahide netijige érishken we saxawetchiliki bilen tonulghan baylardin merhum abdulghafur emin hajimning chong oghli emin abdulghafurning öyide dunyaning her qaysi jayliridin kelgen her millet musulmanlirining uchrishishi bolup ötti.

Bu uchrishishqa yawropa, amérika, kanada, yéngi zéllandiye, rusiye qatarliq döletlerdiki islami jem'iyet we teshkilatlarning wekilliri, shundaqla türkiyide pa'aliyet élip bériwatqan sherqiy türkistan ma'arip we hemkarliq jem'iyitining bashliqi abdulhekimxan mexsum hajim bilen jem'iyetning mu'awin bashliqi abdulxaliq qarimlar ishtirak qildi.

Uchrishishta her yerdin kelgenler özliri turuwatqan dölettiki musulmanlarning ehwali heqqide söz qildi we bezi qiyinchiliqlarni otturigha qoyup hel qilish chariliri heqqidiki köz qarashlirini bayan qildi. Shu arida sherqiy türkistan ma'arip we hemkarliq jem'iyitining bashliqi abdulhekimxan mexsum hajim Uyghurlarni we Uyghur élining hazirqi weziyitini olturghanlargha tonushturup intayin ixcham we tolimu mezmunluq nutuq sözlidi.

Sherqiy türkistan xelqi dunya musulmanlirining yardimige mohtaj

Abdulhekimxan mexsum hajim nutqida mundaq dédi: “Sherqiy türkistan xelqi ming yildin köprek waqittin biri islam dinigha étiqad qilip kéliwatqan musulman xelq. Uyghurlarning wetini bolghan sherqiy türkistan islam dunyasining bir parchisi bolup, bu xelqning ghémini yéyish her bir musulmanning diniy burchidur. Xelqimiz nahayiti éghir künlerni bashtin kechürmekte. Diniy pa'aliyetlirini élip bérish yolidimu her xil we her türlük qiyinchiliqlargha we zorluqlargha uchrap kelmekte. Islam dunyasi pelestinde boluwatqan ishlarni tepsilati bilen waqtida bilip bolidu. Emma sherqiy türkistanda boluwatqanlarni héchkim bilmeydu. Adettiki awam musulmanlar sherqiy türkistan dégen yurtnimu bilmeydu. Bu heqiqeten échinishliq ehwal. Peyghember eleyhissalam musulmanlarni bir-birining halidin xewer élish we bir-birining qiyinchiliqlirini birge hel qilishning her bir musulman üchün zörür ikenlikini tekitlep, musulmanlarning ishigha köngül bölmigen adem bizdin emes, dégen. Hazir sherqiy türkistandiki Uyghur musulmanliri hör dunyadiki musulman qérindashlirining hésdashliqigha, maddiy we meniwi yardimige mohtajdur. Bu musulmanliq burchini ada qilishning eng töwen telipi sherqiy türkistandiki musulman qérindashlar üchün du'a qilish, ularning qiyinchiliqlirining hel bolushini allahtin sorashtur. Bu eng addiy telep bolup, buni ada qilmasliqqa héchkimning özrisi bolmaydu. Shunga Uyghur musulmanliri üchün héch ish qilalmaydighan shara'ittiki musulmanlarning du'alirida bolsimu ashu xelqni yad étishini we shu xelqning arzu-armanlirining yéqin kélechekte emelge éshishigha allahqa séghinip du'a qilishini soraymiz.”

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.