Сәуди әрәбистанида вәқипләрни рәткә селиш қарари елинди

Мәлумки, сәуди әрәбистаниниң мәккә, мәдинә, җиддә вә башқиму районлирида һәр милләт мусулманлириниң байлири тәрипидин тәсис қилинған вәқипләр наһайити көп тепилиду.
Ихтиярий мухбиримиз өмәрҗан
2012-05-13
Share

Җүмлидин уйғурларниң вәқиплириму аз әмәс. Өтмүшләрдә уйғурларниң қол иликидә барлири кейинкиләрниң ғемини йегәнликтин, мәккә вә мәдинә шәһәрлиридә көплигән вәқипләрни тәсис қилип, һәҗ, өмригә баридиған вә сәуди әрәбистанида илим тәһсил қилидиған уйғурларға атиған икән.

Сәуди әрәбистанида чиқидиған "әл нәдвә" гезитиниң 2012-йили 10-май санида "сәуди әрәбистан парламенти вәқипләрни рәткә селиш вә башқуруш тоғрилиқ мәхсус қарар алди" дегән темида бир мақалә елан қилинған болуп, мақалидә мундақ дәп йезилған: "сәуди әрәбистан парламенти 31-қетимлиқ чоң йиғилишида вәқипләрни рәткә селиш вә уларниң кирим вә чиқимлирини тәкшүрүп туридиған мәхсус комитет қуруш һәққидә муһим қарарларни алди. Йиғин қатнашқучилири сәуди әрәбистанидики вәқипләрниң һазирғичә, йиллардин бири мәсуллири тәрипидинла идарә қилинип келиватқанлиқини вә көплигән мәсилиләрниң сақлинип келиватқанлиқини баян қилишти. Йиғин қатнашқучилири йәнә вәқипләрни башқуруш комитети қурулса, көп қийинчилиқларниң һәл болидиғанлиқини, вәқипләрни бу вәқипләрни тәсис қилғучиларниң қойған шәртлири вә арзу-армани бойичә елип берип, уларниң ирадисигә варислиқ қилиш ишлириниң яхши болидиғанлиқини сөзлиди."

Сәуди әрәбистанидики уйғур вәқиплири

Һазир сәуди әрәбистаниниң мәккә вә мәдинә шәһәрлиридә уйғур елиниң һәр қайси шәһәр вә наһийилириниң намида вәқип қилинған биналар көптур. Вәқип биналири бу җайда "рибат"дәп атилиду. Уйғурларниң бу җайлардики вәқип биналири "қәшқәр рибат", "куча рибат", "атуш рибат", "хотән рибат", "қағилиқ рибат", "шаһяр рибат", "уҗат рибат", "ақсу рибат" вә "керийә рибат" дегән намлар билән мәшһурдур. Өтмүштики уйғурларниң сехийлиқи, мәртлики вә әвладлириниң ғемини йейиштәк мәсулийәтпәрвәрлики түрткиси билән барлиққа кәлгән бу рибатлар уйғур елидин һәҗ вә өмрә қилиш үчүн мәккигә келидиған уйғурларниң бирдинбир йетип ‏- қопуш орниға айланған. Бу рибатларниң болғанлиқи үчүн уйғур һаҗилар ятидиған җайниң ғемини қилмайдиған болған.

Һазир уйғурлардин өз алдиға һәҗ, өмригә келидиғанларниң сани интайин азийип кәткәнлики, ана вәтәндә тәшкилләнгән мәхсус өмәк билән кәлгәнләрниң өмәк тәрәптин тәйярланған меһманханиларға чүшкәнлики сәвәблик, улар мәккә вә мәдинә шәһәрлиридики уйғур вәқпилиридин пайдиланмайватмақта. Бу сәвәбтин мәзкур вәқипләрниң һәммиси дегүдәк башқа милләтләргә кираға қоюлмақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт