Se'udi erebistanida weqiplerni retke sélish qarari élindi

Melumki, se'udi erebistanining mekke, medine, jidde we bashqimu rayonlirida her millet musulmanlirining bayliri teripidin tesis qilin'ghan weqipler nahayiti köp tépilidu.
Ixtiyariy muxbirimiz ömerjan
2012-05-13
Share

Jümlidin Uyghurlarning weqiplirimu az emes. Ötmüshlerde Uyghurlarning qol ilikide barliri kéyinkilerning ghémini yégenliktin, mekke we medine sheherliride köpligen weqiplerni tesis qilip, hej, ömrige baridighan we se'udi erebistanida ilim tehsil qilidighan Uyghurlargha atighan iken.

Se'udi erebistanida chiqidighan "El nedwe" gézitining 2012-yili 10-may sanida "Se'udi erebistan parlaménti weqiplerni retke sélish we bashqurush toghriliq mexsus qarar aldi" dégen témida bir maqale élan qilin'ghan bolup, maqalide mundaq dep yézilghan: "Se'udi erebistan parlaménti 31-qétimliq chong yighilishida weqiplerni retke sélish we ularning kirim we chiqimlirini tekshürüp turidighan mexsus komitét qurush heqqide muhim qararlarni aldi. Yighin qatnashquchiliri se'udi erebistanidiki weqiplerning hazirghiche, yillardin biri mes'ulliri teripidinla idare qilinip kéliwatqanliqini we köpligen mesililerning saqlinip kéliwatqanliqini bayan qilishti. Yighin qatnashquchiliri yene weqiplerni bashqurush komitéti qurulsa, köp qiyinchiliqlarning hel bolidighanliqini, weqiplerni bu weqiplerni tesis qilghuchilarning qoyghan shertliri we arzu-armani boyiche élip bérip, ularning iradisige warisliq qilish ishlirining yaxshi bolidighanliqini sözlidi."

Se'udi erebistanidiki Uyghur weqipliri

Hazir se'udi erebistanining mekke we medine sheherliride Uyghur élining her qaysi sheher we nahiyilirining namida weqip qilin'ghan binalar köptur. Weqip binaliri bu jayda "Ribat"dep atilidu. Uyghurlarning bu jaylardiki weqip binaliri "Qeshqer ribat", "Kucha ribat", "Atush ribat", "Xoten ribat", "Qaghiliq ribat", "Shahyar ribat", "Ujat ribat", "Aqsu ribat" we "Kériye ribat" dégen namlar bilen meshhurdur. Ötmüshtiki Uyghurlarning séxiyliqi, mertliki we ewladlirining ghémini yéyishtek mes'uliyetperwerliki türtkisi bilen barliqqa kelgen bu ribatlar Uyghur élidin hej we ömre qilish üchün mekkige kélidighan Uyghurlarning birdinbir yétip ‏- qopush ornigha aylan'ghan. Bu ribatlarning bolghanliqi üchün Uyghur hajilar yatidighan jayning ghémini qilmaydighan bolghan.

Hazir Uyghurlardin öz aldigha hej, ömrige kélidighanlarning sani intayin aziyip ketkenliki, ana wetende teshkillen'gen mexsus ömek bilen kelgenlerning ömek tereptin teyyarlan'ghan méhmanxanilargha chüshkenliki seweblik, ular mekke we medine sheherliridiki Uyghur weqpiliridin paydilanmaywatmaqta. Bu sewebtin mezkur weqiplerning hemmisi dégüdek bashqa milletlerge kiragha qoyulmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet