Көзәткүчиләр: «хитайниң уйғур елида 100 миң кишини йөткәп ишқа орунлаштуруш пилани гуманлиқ»

Мухбиримиз шөһрәт һошур
2018-01-10
Елхәт
Пикир
Share
Принт

Шинхуа агентлиқи бүгүн уйғур аптоном районлуқ даириләрниң 2018‏-йилидин 2020‏-йилиға қәдәр райондики 4 намрат вилайәттин 100 миң әмгәк күчини йөткәп ишқа орунлаштуридиғанлиқини хәвәр қилди.

Хәвәрдә дейилишичә, қәшқәр, ақсу, хотән вә қизилсуда вилайәт вә област атлап ишқа орунлаштуруш, хитайниң ички өлкилиригә йөткәп ишқа орунлаштуруш вә өз тәвәликидики завут-фабрикиларға йөткәп ишқа орунлаштуруш қатарлиқ тәдбирләр пиланлиқ вә тәшкиллик һалда қоллинилмақтикән.

Хәвәрниң ахирида қәшқәр вә хотәндә бу пиланни әмәлгә ашуруш үчүн 2017‏-йили 1милйон 259 миң адәм қетим кәспий техника бойичә «тәрбийиләш» елип берилғанлиқи әскәртилгән. Әмма хәвәрдә тилға елинған бу «тәрбийиләш» ниң қәшқәр вә хотәнләрдә өткән йили марттин башланған «йепиқ тәрбийиләш мәркәзлири» ни өз ичигә алидиған яки алмайдиғанлиқи баян қилинмиған.

Бу нуқта район вәзийитини изчил көзитип келиватқан муһаҗирәттики уйғур көзәткүчилириниң гуманини қозғиди. Вашингтонда яшаватқан көзәткүчи учқунҗан әпәнди, хитай даирилириниң нөвәттики «йепиқ тәрбийиләш мәркәзлири» ни дуняға пәрдазлап көрситиш үчүн бир қисим сүний пиланларни оттуриға қоюватқанлиқини илгири сүрди.

Мухбиримизниң ғулҗа наһийисидики «йепиқ тәрбийиләш мәркәзлири» гә қарита елип барған телефон зиярәтлири давамида даириләрниң қисқиғинә 6 ай ичидә мәзкур мәркәзләрниң намини «кәспий тәрбийиләш мәктипи», «қанун түзүм мәктипи» вә «ишқа орунлаштуруш мәктипи» дегәндәк 4 қетим өзгәртип чиққанлиқи ашкариланған иди.

Пикирләр (0)
Share
Толуқ бәт