Әһмәд заһид: «малайшия һөкүмити 11 уйғур қачқун мәсилисини дипломатик усулда һәл қилиду!»

Мухбиримиз әзиз
2018-02-20
Елхәт
Пикир
Share
Принт

Тайланд түрмисидин қечип чиққан 11 уйғур малайшияда тутулуп қалғандин кейин малайшия һөкүмити бу уйғурларни тайландқа әмәс, хитай тәрәпкә қайтуруп бериш һәққидә хитайниң қаттиқ бесимиға дуч кәлгән. Бүгүн малайшия һөкүмити бу мәсилини дипломатик йосунда һәл қилмақчи болуватқанлиқини билдүргән.

Ройтерс агентлиқиниң 20-февралдики хәвиригә қариғанда, малайшияниң орунбасар баш министири әһмәд заһид бу һәқтә сөз қилип, «биз нөвәттә тайланд тәрәп билән бу мәсилини сөзлишиватимиз. Биз дипломатик усулда иш көрүп, һечқайси тәрәп рәнҗимәйдиған бир һәл қилиш чарисини тепип чиқишқа тиришимиз» дегән.

Мәлум болушичә, америка һөкүмити вә бир қисим тәшкилатлар малайшия һөкүмитини бу уйғурларни хитайға қайтуруп бәрмәслик һәмдә уларни қоғдашқа чақирмақта икән.

Малайшиядики әң чоң гезитләрдин «йеңи боғуз вақти» ниң 20-февралдики санида ейтилишичә, әһмәд заһид бүгүн чақирилған мухбирларни күтүвелиш йиғинида бу уйғурларни тайландқа қайтуруп бериш һәққидә қарар елинмиғанлиқини тәкитлигән һәмдә хәлқара җәмийәтниң наразилиқини диққәттин сақит қилмайдиғанлиқини билдүргән. Шуниңдәк пат йеқинда елинмақчи болған қарарниң әң яхши һәл қилиш чариси болуп қалидиғанлиқини билдүргән.

Мәлум болушичә, нөвәттә 100 дин 200 гичә уйғур қачқун тайландтики йиғивелиш мәркәзлиридә қамақта икән.

Пикирләр (0)
Share
Толуқ бәт