Ehmed zahid: “Malayshiya hökümiti 11 Uyghur qachqun mesilisini diplomatik usulda hel qilidu!”
2018.02.20
Tayland türmisidin qéchip chiqqan 11 Uyghur malayshiyada tutulup qalghandin kéyin malayshiya hökümiti bu Uyghurlarni taylandqa emes, xitay terepke qayturup bérish heqqide xitayning qattiq bésimigha duch kelgen. Bügün malayshiya hökümiti bu mesilini diplomatik yosunda hel qilmaqchi boluwatqanliqini bildürgen.
Roytérs agéntliqining 20-féwraldiki xewirige qarighanda, malayshiyaning orunbasar bash ministiri ehmed zahid bu heqte söz qilip, “Biz nöwette tayland terep bilen bu mesilini sözlishiwatimiz. Biz diplomatik usulda ish körüp, héchqaysi terep renjimeydighan bir hel qilish charisini tépip chiqishqa tirishimiz” dégen.
Melum bolushiche, amérika hökümiti we bir qisim teshkilatlar malayshiya hökümitini bu Uyghurlarni xitaygha qayturup bermeslik hemde ularni qoghdashqa chaqirmaqta iken.
Malayshiyadiki eng chong gézitlerdin “Yéngi boghuz waqti” ning 20-féwraldiki sanida éytilishiche, ehmed zahid bügün chaqirilghan muxbirlarni kütüwélish yighinida bu Uyghurlarni taylandqa qayturup bérish heqqide qarar élinmighanliqini tekitligen hemde xelq'ara jem'iyetning naraziliqini diqqettin saqit qilmaydighanliqini bildürgen. Shuningdek pat yéqinda élinmaqchi bolghan qararning eng yaxshi hel qilish charisi bolup qalidighanliqini bildürgen.
Melum bolushiche, nöwette 100 din 200 giche Uyghur qachqun taylandtiki yighiwélish merkezliride qamaqta iken.