15 Yashliq Uyghur yigiti jumulangma téghini boysundurghan

Washin'gtondin muxbirimiz irade teyyarlidi
2024.05.24

Yéqindin buyan ijtima'iy taratqularda 15 yashliq bir Uyghur ösmürning dunyaning eng égiz tagh choqqisi dep qobul qilin'ghan jumulangma choqqisigha chiqqanliqi heqqidiki xewerler tarqalghanidi. Bügün yeni 24-may küni, xitayning hökümet awazi bolghan shinxu'a agéntliqimu in'glizche xewer tarqitip buning toghriliqini delilligen.

Shinxu'a torining déyishiche, elqut dilshat isimlik 15 yashliq ösmür 19-may yekshenbe küni etigende jumulangma choqqisining jenubiy teripige muweppeqiyetlik halda chiqip, pütün xitayning diqqitini qozghighan.

Elqut dilshat bu netijisi bilen “Dunyaning ögzisi” dep bilinidighan jumulangma téghini boysundurghan eng yash tewekkülchi ezimet bolup qalghan.

Xewerdin qarighanda, elqut dilshat ürümchide tughulup chong bolghan bolup, u kichikidin tartip “Shinjang taghqa chiqish tenterbiye mulazimet merkizi” ning dala qutquzush etritining bashliqi bolup xizmet qilidighan dadisining tesiride dala tenterbiyesige ishtiyaq baghlighaniken.

 U 10 yéshidin bashlap taghqa chiqishni bashlighan bolup, dada-bala ikkisi bultur 8-ayda ikkinchi égiz tagh bolup hésablinidighan 7546 métir égizliktiki muztagh atagha chiqqaniken.

Elqut dilshat shinxu'a torining ziyaritini qobul qilghanda “Gerche taghqa yamishish japaliq bolsimu, hetta bezide bek qorqunchluq bolsimu, her qétim choqqigha yétip barghinimda méning yene buni dawamlashturghum kélidu” dégen.

Xewerde déyilishiche, uning jumulangma téghigha chiqish oyi ötken yili öktebirde barliqqa kelgen, u dadisi bilen bille tengri téghidiki bir choqqigha chiqqandin kéyin ishenchi artip, jumulangmagha chiqish niyitige kelgen.

Jumulangma choqisining déngiz yüzidin égizliki 8848. 86 Métir bolup, dunyadiki eng égiz choqqidur.

Shinxu'a torining ilgiri sürüshiche, elqutnng dadisi dilshat uning ilgiriki seperliride dawamliq bille bolsimu, biraq bu qétim xizmet sewebidin uning yénida bolalmighan. Shunga elqut népalgha yalghuz barghan. U desleptiki 28 künlük maslishish meshqi jeryanida qandiki küchlük oksidlinishtin kélip chiqqan salametlik mesilisi we rohiy özgirishlerni bashtin kechürgen. Uning 49 yashliq dadisi dilshat oghligha téléfon arqiliq teselli bérip turghan. U axiri barliq qiyinchiliqlarni yéngip, jumulangma choqqisigha chiqish arzusini emelge ashurghan.

Melum bolushiche, jumulangma téghi choqqisigha chiqqandin kéyin, elqut derhal ürümchige qaytip kelgen. U bu yil 6-aydiki toluq ottura mektep imtihanigha qatnishidiken. U özining bu jehettiki qiziqishi we arzulirini dawamlashturidighanliqini éytqan.

 

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.