Уйғур диярида 19-қурултай алдида муқимлиқни күчәйтиш тәкитләнмәктә

Мухбиримиз үмидвар
2017-09-24
Елхәт
Пикир
Share
Принт

Хитай компартийисиниң 19-қурултийиниң ечилиш вақти йеқинлашқансери чен чүәнго башчилиқидики уйғур аптоном райони коммунистик партийә комитетиниң 19-қурултай алдидики муқимлиқни күчәйтиш тәдбирлирини ашуруватқанлиқи мәлум болмақта. Уйғур аптоном районлуқ партком бу мунасивәт билән җай-җайларға өз мәсул рәһбири кадирлирини әвәтип, муқимлиқни қоғдаш вә аталмиш «икки йүзлимичиләр» гә, «үч хил күчләр» гә қарши күрәшни техиму чиң тутуш шуниңдәк бәзи орунлаштурушларни елип бармақта.

Йеқинда уйғур дияридики муқимлиқ ишлириға мәсул, аптоном районлуқ сиясий-қанун комитетиниң секретари җу хәйлүн хотән вилайитигә берип, хотән вилайәтлик парткомниң йиғинини ачқан вә йиғинда рәһбири кадирлардин «сиясий интизам», «бөлгүнчиликкә қарши күрәш қилиш интизами», «тәшкилий интизами» қатарлиқларни чиң тутушни тәләп қилған, шуниңдәк «пүтүн күчи билән муқимлиқ хизмити ишләп, яхши нәтиҗиләр билән 19-қурултайни күтүвелишимиз керәк» дәп тәкитлигән.

Хотән вилайити йеқинқи йиллардин буян уйғурларниң һәр хил шәкилдики наразилиқ һәрикәтлири әң көп йүз бәргән җай болуп, чен чүәнго уйғур аптоном райониниң партийә вә мәмурий һоқуқини игилигәндин буянқи зор дәриҗидә күчәйтилгән аталмиш «үч хил күчләр» вә «икки йүзлимичиләр» гә зәрбә бериш долқунида хотән вилайити тәвәсидин бир қисим һәр дәриҗилик йәрлик кадирларму җазаға учриған иди.

Тәңритағ ториниң хәвәр қилишичә, 19-қурултайни күтүвелиш үчүн муқимлиқни күчәйтиш мәқситидә йәнә уйғур аптоном районлуқ парткомниң даимий һәйәт әзалиридин әркин тунияз, шавкәт имин, ли шөҗүн вә башқилар айрим-айрим һалда қумул, чөчәк, турпан, қизилсуни өз ичигә алған 9 област вә вилайәт компартийә мәсуллири билән сөһбәт йиғини ачқан. Буларниң һәммиси сөзлиридә нуқтилиқ һалда 19-қурултай һарписида аталмиш «үч хил күчләр» вә «икки йүзлимичиләр» гә қарши «бир мәйдан хәлқ уруши» ни техиму яхши елип беришни тәкитләшкән. 

Көпинчә анализчилар чен чүәнгониң уйғур дияридики муқимлиқни күчәйтиш нами астидики қаттиқ зәрбә бериш нәтиҗилири арқилиқ худди илгирики сабиқ секретарлар ваң лечүән, җаң чүншәнләргә охшаш, хитай компартийиси сиясий бюросиға киришкә интиливатқанлиқини тәһлил қилишмақта.

Пикирләр (0)
Share
Толуқ бәт