Uyghur diyarida 19-qurultay aldida muqimliqni kücheytish tekitlenmekte

Muxbirimiz ümidwar
2017-09-24
Élxet
Pikir
Share
Print

Xitay kompartiyisining 19-qurultiyining échilish waqti yéqinlashqanséri chén chüen'go bashchiliqidiki Uyghur aptonom rayoni kommunistik partiye komitétining 19-qurultay aldidiki muqimliqni kücheytish tedbirlirini ashuruwatqanliqi melum bolmaqta. Uyghur aptonom rayonluq partkom bu munasiwet bilen jay-jaylargha öz mes'ul rehbiri kadirlirini ewetip, muqimliqni qoghdash we atalmish "Ikki yüzlimichiler" ge, "Üch xil küchler" ge qarshi küreshni téximu ching tutush shuningdek bezi orunlashturushlarni élip barmaqta.

Yéqinda Uyghur diyaridiki muqimliq ishlirigha mes'ul, aptonom rayonluq siyasiy-qanun komitétining sékrétari ju xeylün xoten wilayitige bérip, xoten wilayetlik partkomning yighinini achqan we yighinda rehbiri kadirlardin "Siyasiy intizam", "Bölgünchilikke qarshi küresh qilish intizami", "Teshkiliy intizami" qatarliqlarni ching tutushni telep qilghan, shuningdek "Pütün küchi bilen muqimliq xizmiti ishlep, yaxshi netijiler bilen 19-qurultayni kütüwélishimiz kérek" dep tekitligen.

Xoten wilayiti yéqinqi yillardin buyan Uyghurlarning her xil shekildiki naraziliq heriketliri eng köp yüz bergen jay bolup, chén chüen'go Uyghur aptonom rayonining partiye we memuriy hoquqini igiligendin buyanqi zor derijide kücheytilgen atalmish "Üch xil küchler" we "Ikki yüzlimichiler" ge zerbe bérish dolqunida xoten wilayiti tewesidin bir qisim her derijilik yerlik kadirlarmu jazagha uchrighan idi.

Tengritagh torining xewer qilishiche, 19-qurultayni kütüwélish üchün muqimliqni kücheytish meqsitide yene Uyghur aptonom rayonluq partkomning da'imiy hey'et ezaliridin erkin tuniyaz, shawket imin, li shöjün we bashqilar ayrim-ayrim halda qumul, chöchek, turpan, qizilsuni öz ichige alghan 9 oblast we wilayet kompartiye mes'ulliri bilen söhbet yighini achqan. Bularning hemmisi sözliride nuqtiliq halda 19-qurultay harpisida atalmish "Üch xil küchler" we "Ikki yüzlimichiler" ge qarshi "Bir meydan xelq urushi" ni téximu yaxshi élip bérishni tekitleshken. 

Köpinche analizchilar chén chüen'goning Uyghur diyaridiki muqimliqni kücheytish nami astidiki qattiq zerbe bérish netijiliri arqiliq xuddi ilgiriki sabiq sékrétarlar wang léchüen, jang chünshenlerge oxshash, xitay kompartiyisi siyasiy byurosigha kirishke intiliwatqanliqini tehlil qilishmaqta.

Toluq bet