"Xristi'an pochtisi" géziti: "Bir milyondin artuq Uyghur yighiwélish lagérida, emma dunya yenila sükütte"

Muxbirimiz shöhret hoshur
2018-07-26
Élxet
Pikir
Share
Print

Dangliq axbarat wasitiliridin biri bolghan "Xristi'an pochtisi" gézitining xewer tori bügün sha'ir tahir hamutning aldinqi küni amérika dölet ishliri ministirliqi uyushturghan "Diniy erkinlikni ilgiri sürüsh" yighinida qilghan guwahliq sözlirige kengri orun berdi.

"Bir milyondin artuq Uyghur musulmanliri yighiwélish lagérida, emma dunya yenila sükütte" dep mawzu qoyulghan bu xewerde tahir hamutning guwahliq sözliridin neqiller élinip, Uyghur diyarida xitay zulumining rayonni ishghal qilish bilen teng bashlan'ghanliqi, 2001‏-yildiki "11‏-Séntebir weqesi" din kéyin zulumning téximu kücheygenliki, 2016‏-yildin bashlap Uyghur diyarining bir saqchi döliti we üsti ochuq türmige aylandurulghanliqi, nöwette bir milyondin artuq Uyghurning teqdiri éniqsiz halette "Yighiwélish lagérliri" da tutup turuluwatqanliqi bayan qilin'ghan.

Xewerde yene nöwette lagérdiki Uyghurlarning özlirining néme üchün tutulghanliqi, nede turuwatqanliqi we qachan qoyup bérilidighanliqidin xewersiz ikenliki eskertilgen. 

Mezkur xewerde yene sha'ir hamutning guwahliq sözliridin jümlimu-jümle neqil élinip, nöwette lagérgha kirip ketkenlerning késili we ölümidin xewer chiqiwatqan bolsimu, emma ularning tiriklikidin uchur élinmaywatqanliqi ilgiri sürülgen. Tahir hamut sözide Uyghur diyaridiki yighiwélish lagérlirida xudi natsistlar ötken esirde yehudiylargha élip barghandek bir qirghinchiliqning yüz bérish éhtimalliqini tilgha alghan.

Xewerde déyilishiche, tahir hamut aldinqi künidiki guwahliq sözide Uyghurlarning lagérdiki ehwaligha dunya jama'itining yéterlik köngül bölmeywatqanliqi, buning netijiside Uyghurlar qarita zulumning yenimu qatlinip dawam qiliwatqanliqini bayan qilghan. U xelq'ara jama'etni Uyghurlarning milliy we diniy kimlikini qoghdash we öz teqdirini özi belgilesh hoquqini qolgha keltürüsh jehettiki heriketlirige yardem bérishke chaqirghan. 

Mezkur tor betning tonushturush sehipisidin melum bolushiche, "Xristi'an pochtisi" gézitining xewer tori 2004‏-yilidin bashlap amérikini merkez qilghan halette xristi'an dunyasigha qarita xelq'araliq axbarat mulazimiti bilen shughullanmaqtiken.

Toluq bet