Америкиниң “2016-йиллиқ хәлқара диний әркинлик доклати” хитайниң қаттиқ оғисини қайнатти

Мухбиримиз қутлан
2017.08.20

15-Авғуст күни америка дөләт ишлири министирлиқи “2016-йиллиқ хәлқара диний әркинлик доклати” ни елан қилған иди.

Доклатта өткән бир йилда дуня миқясида көрүлгән диний мәсилиләр баян қилинған болуп, униңда хитайниң өз территорийисидики пуқраларниң, болупму уйғур мусулманлириниң диний етиқадиға қаратқан тәқипиниң күнсайин ашқанлиқи алаһидә тилға елинди.

Игилинишичә, америкиниң мәзкур доклати хитайниң ечишқан йеригә туз сәпкән. 16-Авғуст күни қаттиқ оғисини қайниған хитай өзиниң ташқи ишлар министирлиқи арқилиқ җиддий инкас қайтурған.

Хитай ташқи ишлар министирлиқиниң шу күнидики инкасида америкини “дин мәсилисини баһанә қилип, башқа дөләтләрниң ички ишлириға арилашти,” дәп тәнқид қилған.

Хитай ташқи ишлар министирлиқиниң баянатчиси хва чүнйиң 16-авғуст күни мухбирларни күтүвелиш йиғинида мундақ дегән: “биз бу доклатни көрдуқ. Җуңгодики һәр милләт хәлқи вә җайлардики хәлқ диний етиқад әркинликидин қанун бойичә толуқ бәһримән болуватиду. Америкиниң бу аталмиш доклатида әмәлийәтни көзгә илмай, ақ-қарини астин-үстүн қилип, җуңгониң диний әркинлик әһвалини орунсиз әйиблигән.”

У йәнә мундақ дегән: “пакитлар көрситип туруптики, америкиму кәм-күтисиз әмәс. Биз америкини төвәндикиләргә дәвәт қилимизки, америка өз иши билән бәнд болғай; аталмиш ‛дин мәсилиси‚ ни баһанә қилип, башқа дөләтләрниң ички ишлириға арилишиштәк хата қилмишини тохтатқай!”

Көзәткүчиләр, хитайниң бу инкаси уларниң өзидики мәвҗут мәсилиләргә, болупму таратқулар арқилиқ пүтүн дуняға аян болуватқан хитайдики диний вә милләтләр мәсилисигә қарита қайта ойлинип көрүш сәмимийитиниң әсла йоқлуқини көрситип бериду, дәп қаримақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.