Хитайниң бир һөкүмәт гезити партийә әзалириниң аз дигәндә 3 балилиқ болушини тәләп қилған

Мухбиримиз әркин
2021.12.10
Share on WhatsApp
Share on WhatsApp

Хитай уйғурларниң нупусини ғәрәзлик, пиланлиқ, системилиқ азайтип, “ирқий қирғинчилиқ” қилиш билән әйибләнгән бир вақитта, хитайниң бир һөкүмәт гезити партийә әзалириниң аз дигәндә 3 балилиқ болуп, хитай нупусиниң көпийишидики “мәсулийәтни зимисигә елиши” ни тәләп қилған. Мәзкур тәһрират мақалиси “хитай доклат тори” намлиқ һөкүмәт гезити тәрипидин ‍өткән айда елан қилинип, узун өтмәй тордин елип ташланған.

Әнгилийә “мустәқиллиқ” гезитиниң хәвәр қилишичә, бу тәһрират мақалиси тордин елип ташланған болсиму, бирақ униң бир нусхиси 8-декабир күни хитай иҗтимаий таратқулирида кәң тарқилип, муназирә қозғиған. Хәвәрдә ейтилишичә, тәһрират мақалисида “һечқандақ бир партийә әзаси той қилмаслиқ яки балилиқ болмаслиқ үчүн баһанә көрсәтмәслики керәк,” дейилгән икән.

Бу муназирә америка дөләт мәҗлиси хитайниң уйғурларға ирқий қирғинчилиқ қилғанлиқи тоғрисида қарар мақуллиған, шундақла “уйғур сот коллегийәси” му хитайниң уйғурларға “ирқий қирғинчилиқ” вә “инсанийәткә қарши җинайәт” садир қилғанлиқини қобул қилип, ши җинпиң, чен чуәнго қатарлиқларни бу җинайәтниң бивастә җавабкари, дәп елан қилған бир вақитта қозғалған. Лондондики “уйғур сот коллегийәси” ниң ейтишичә, хитай һөкүмитиниң мәҗбурий бала чүшүрүш, туғмас қилиш қатарлиқ вастилар арқилиқ уйғур нупусини “ғәрәзлик, пиланлиқ, системилиқ азайтип”, ирқий қирғинчилиқ садир қилғанлиқи ениқ икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт