Kishilik hoquqni közitish teshkilati xitay da'irilirini “4‏-Iyun weqesi” ni xatirileshke yol qoyushqa chaqirdi

Kishilik hoquqni közitish teshkilati xitay dölet re'isi shi jinping we bashqa xitay rehberlirining döletni qanun bilen idare qilish wedisige emel qilip, buningdin 24 yil awwal 4‏-iyun küni tyen'enméndiki namayishchi xelqni qirghin qilish weqeside, hökümetning mes'uliyiti barliqini étirap qilishqa, puqralarning “4‏-Iyun weqesi” ni xatirilishige yol qoyushqa chaqirdi.

Kishilik hoquqni közitish teshkilati bayanatida xitay hökümitini tenqidlep, uning qanliq basturush yüz bérip 24 yil kéyinmu, özining tyen'enméndiki naraziliqni basturup xatalashqanliqini ret qilip kéliwatqanliqi, ölgenlerni yoshurup, mes'uliyiti barlarni qanuniy jawabkarliqqa tartmighanliqi, ziyankeshlikke uchrighanlarni we hayat qalghanlarning a'ile tawabi'atlirini jazalap, yighilish, ipade erkinlikini qattiq kontrol qilip kéliwatqanliqini bildürgen.

Xitay armiyisi 1989‏-yili 3‏-iyun kéchisi tanka we bronéwiklar bilen tyen'enmén meydanigha basturup kirip, meydanda chédir qurup yatqan namayishchi oqughuchilarni qanliq basturghan.

Shu kéchisi qanche ademning ölgenliki hazirgha qeder sir bolup keldi. Xitay hökümiti ölgen, qolgha élin'ghan we iz-déreksiz ghayib bolghanlar heqqide héchqandaq uchur élan qilip baqmighan.

Kishilik hoquqni közitish teshkilatining asiya ishlirigha mes'ul xadimi, doktor sofiye richardson xanim eskertip: xitay rehberliri izchil tyen'enménni tarix kitabliridin öchürüwétishke urunup keldi. Yéngi rehberler bashqichirek yol tutup, özini burunqi rehberlerdin ayrip qarishi kérek. Buning eng yaxshi bashlinish nuqtisi, a'ile-tawabi'atliri we pa'aliyetchilerning 4‏-iyunni xatirjem xatirilishige yol qoyushtur, dégen.