Xitay da'iriliri ürümchi shehirining asasliq rayonlirini 5G tori bilen qaplap bolghan

Muxbirimiz erkin
2020-07-06
Élxet
Pikir
Share
Print

Xitay hökümiti Uyghur rayonida 5G tor qurulushining sür'itini tézlitip, ürümchi shehirining asasliq rayonlirini 5G tori bilen qaplap bolghan. Shinxu'a agéntliqining xewer qilishiche, nöwette ürümchidiki tömür yol idarisi, xu'angxé soda rayoni, dostluq soda rayoni, midong soda rayoni, shawshigo soda rayoni, ayrodrom we tez sür'etlik poyiz yoli liniyisining ikki qasniqi qatarliq adem éqimi köp rayonlar 5G tori bilen qaplinip resmiy ishqa kirishken. Xitay da'iriliri ötken yildin bashlap Uyghur diyarida 5G qurulushini téz omumlashturushqa kiriship, uninggha zor miqdarda meblegh ajratqan.

Lékin 2017-yildin burun Uyghur diyarining jenubidiki rayonlarning tor sür'itini 2G gha chüshürüp qoyghan xitay da'irilirining, 2019-yildin bashlap rayonda 5G qurulushini téz sür'ette kéngeytishi közetküchilerning diqqitini qozghighan. Közetküchiler, Uyghur diyarida 5G tor qurulushining omumlishishi Uyghurlargha qarita téximu qattiq, téximu tepsiliy we téximu téz nazaret méxanizmi shekillendüridighanliqini ilgiri sürmekte.

Xitay hökümiti yéqinda bu qurulushqa 2 milyard som ajratqanliqi, bu yil rayonda 5 minggha yéqin 5G alaqe munari quridighanliqini jakarlighanidi.

Shinxu'a agéntliqining bildürüshiche, nöwette ürümchi shehiridiki asasliq rayonlarda 2379 alaqe munari qurulghan. Buning ichidiki 1861 alaqe munari bu yil ichide qurulghaniken. Ürümchidiki alaqe munarlirining qurulushi xitayning "Junggo köchme téléfon shirkiti" ge höddige bérilgen. Uyghur diyarining 5G tor qurulushi "Junggo köchme téléfon shirkiti" qatarliq 3 xitay tor alaqe shirkitige höddige bérilgenidi.

Toluq bet