Sana'etleshken 7 dölet guruhi xitaygha qarshi 600 milyard dollarliq ul esliheler qurulushi pilanini bashlatqan

Muxbirimiz erkin
2022.06.27
Share on WhatsApp
Share on WhatsApp

Gérmaniyede ötküzülgen sana'etleshken 7 dölet guruhining rehberliri yighini 26-iyun, yeni yekshenbe küni xitayning “Bir belwagh bir yol” qurulushigha qarshi kelgüsi besh yilda tereqqiy qiliwatqan döletlerning ul eslihe qurulushigha 600 milyard dollar meblegh sélish pilanini qobul qilghan.

Gérmaniyening bawariye shitatidiki shilos elmo qoruqida uchrashqan amérika prézidénti baydén we sana'etleshken 7 dölet guruhidiki en'giliye bash ministiri boris jonson, kanada bash ministiri jastin trédo, yaponiye bash ministiri fumi'o kishida, fransiye prézidénti émanu'él makron qatarliq rehberler “Yer shari ul esliherler we meblegh sélish ortaq hemkarliqi” namliq programmini birlikte testiqlighan.

Roytérs agéntliqining xewer qilishiche, bu yighinda prézidént baydén, “Tereqqiy qiliwatqan döletlerde yuqumgha oxshash yer shari xaraktérlik dawalghushlarni kontrol qilishqa yardem béridighan mohim ul esliheler kemchil, shunga ular buning tesirini téximu keskin hés qildi we eslige kélishte qiynaldi… bu peqet insanperwerlik mesilisila emes, u hemmimizning iqtisadiy we bixeterlik mesilisidur,” dégen. Prézidént baydénning éytishiche, amérika kelgüsi besh yilda fédiral hökümet we xususiy meblegh fondiliridin 200 milyard dollar chiqirip, töwen we ottura hal kirimdiki döletlerning hawa kélimat özgirishi, yer shari saghlamliq, jinsiy barawerlik we digital ul eslihe qurulushlirini yaxshilishigha yardem béridiken.

Roytérs agéntliqining éytishiche, yighinda yawropa komissiyonining prézidénti ursula fon dér léyin, ‍oxshash bir waqitta yawropaning 317 milyard dollar toplap, xitayning 2017-yildin bashlap yolgha qoyushqa bashlighan “Bir belwagh bir yol” qurulushigha qarshi izchiliqqa ige yene bir qurulush élip baridighanliqini éytqan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.