37 Teshkilat amérika tamozhna da'iliridin Uyghur rayonida ishlepchiqirilghan toqumichiliq mehsulatlirini chekleshni telep qildi

Muxbirimiz erkin
2019-10-21
Élxet
Pikir
Share
Print

Lantos kishilik hoquq fondi, amérika Uyghur birleshmisi, xitay puqralar küchi teshkilati qatarliq 37 xelq'ara teshkilat yéqinda amérika chégra qoghdash we tamozhna idarisining muweqqet mudiri mark morgan'gha mektup yézip, Uyghur aptonom rayonida we xitayning bashqa jaylirida mejburiy emgek arqiliq ishlepchiqirilghan toqumichiliq mehsulatlirining amérika bazirigha kirishini chekleshni telep qilghan. Birleshme imzaliq mektupta, xitayning shinjang we bashqa jaylarda kishilerni sistémiliq mejburiy emgekke séliwatqanliqigha da'ir muhim deliller barliqi, amérikagha import qiliniwatqan paxta, toqumichiliq, kiyim-kéchek mehsulatlirining mejburiy emgek bilen ishlepchiqiriliwatqanl'iqi tekitlen'gen.

Mektupta amérikadiki "Xitay puqralar küchi" teshkilatining yéqinda élan qilin'ghan doklati neqil keltürülüp: "Xitay shirketliri we shahitlarning guwahliqi dunyadiki eng chong paxta ishlepchiqarghuchi bolghan xitayning dunyadiki eng chong mejburiy emgek sistémisini berpa qilip, özining paxta ishlepchiqirishini ishchi bilen teminlewatqanliqini körsetmekte. Mezkur 'paxta gulagliri' xitaydiki Uyghur we bashqa musulmanlarning yurti bolghan shinjangni baza qilip, xitay paxta mehsulatining 84 % ni ishlepchiqarmaqta" déyilgen.

"Xitay puqralar küchi teshkilati" yéqinda "Yalghanchiliqning gezmili ‏-paxta: shinjangdiki mejburiy emgek we xitayning yershari teminat zenjiri" namliq doklat élan qilghan. Doklatta, xitay hökümitining toqumichiliq karxanilar bilen til biriktürüp, lagérdiki Uyghur tutqunlirini toqumichiliq fabrikilirida emgekke séliwatqanliqigha da'ir nurghun deliller ashkarilan'ghan. Xitayning hökümitining 2018‏-yili 450 ming Uyghurni bu karxanilargha orunlashturghanliqi tekitlen'gen idi. Mektupta, mejburiy emgekning Uyghur rayonida omumyüzlük mewjut hadise ikenliki tekitlinip: "Shunga, amérika chégra qoghdash we tamozhna idarisi türkmenistanning paxta mehsulatini chekligendek xitayda mejburiy emgek arqiliq ishlepchiqirilghan mehsulatlarghimu oxshash ölchem qoyushi kérek" déyilgen.

Toluq bet