En'gliye BBC muxbirliri Uyghur diyaridiki lagérlarning ichki mahiyitini ashkarilidi

Muxbirimiz sada
2019-06-18
Élxet
Pikir
Share
Print

Yéqinda Uyghur diyaridiki atalmish "Téxnika terbiyilesh mektipi" de ziyarette bolghan en'gliye radi'o BBC agéntliqi muxbiri jon sadwon bu jaylardiki "Saxtiliq" larni bayqap, buning xitay hökümiti teshwiq qilghandek normal jay emeslikini ispatlap chiqqan.

BBC Ning 17-iyun küni élan qilghan sin xewiride déyilishiche, xitay da'iriliri muxbirlarni bu "Mektep" lerni ularning nazariti astida ziyaret qilishqa teklip qilghan. Ziyaret dawamida jon sadwon bu jayda "Terbiyeliniwatqanlar" ning kompyutérida "Men junggo kommunistik partiyesini söyimen", "Men besh yultuzluq qizil bayraqni söyimen". . . Dégendek jümlilerni yézip olturghanliqini körgen. 
Jon sadwon "Oqutquchi" lardin bu "Oqughuchilar" ning néme sewebtin bu jaygha kelgenlikini sorighinida, ularning "Ashqun idiye" bilen yuqumlan'ghanliqini, ularning özliri xalap bu yerge terbiyelinishke kelgenlikini ilgiri sürgen. Qiziq yéri "Terbiyelen'güchiler" bu yerge özining xalap kelgenlikini qayta-qayta eskertken. 

Mezkur sin xewiride tilgha élin'ghan yene bir muhim nuqta lagérlarni qorshap turghan közitish munaridur. Jon sadwonning bildürüshiche, lagérlarning ilgiri tartilghan sün'iy hemrah süritide etrapta köpligen "Közitish munari" bar bolup, muxbirlar bu jaygha ziyaretke kélishtin bir nechche kün awwal bu munarlar éliwétilgen. Etraptiki quruq bir yer tenheriket meydanigha özgertilip, muxbirlar kelgende "Oqughuchilar" herxil tenheriket pa'aliyetliri bilen shughullan'ghan.

Sin xewiridiki qiziq nuqtilarning yene biri shuki, jon sadwon xitay da'irilirining nazaritisiz mektepning keynidiki bir jayni körgili barghinida, munasiwetlik kishiler teripidin sin'gha élishi cheklen'gen. 

Jon sadwon yuqiri nuqtilardin xitay hökümitining chet'el muxbirliri üchün "Saxta meydan" yasighanliqini éytip ötken.

Toluq bet