Б д т: "хитайниң уйғур районидики йиғивелиш лагерлиридин қаттиқ әндишә қиливатимиз"

Мухбиримиз әркин
2018-08-10
Share

Б д т ниң ирқий айримичилиқни түгитиш комитети 10‏-авғуст хитайниң уйғур районида йиғивелиш лагерлирини қуруп, бир милйондәк уйғурни бу лагерларға қамиғанлиқиға даир ишәнчлик учурларға еришкәнлики вә буниңдин қаттиқ әндишә қиливатқанлиқини билдүргән. Бу, б д т ниң тунҗи қетим уйғур районидики йиғивелиш лагерлириға рәсмий инкас қайтурушидур. Б д т ирқий айримичилиқни түгитиш комитетиниң йиғини 6‏-авғуст башланған. 3 Һәптилик бу йиғинда хитай, куба, боснийә-гертсеговина қатарлиқ 9 дөләтниң ирқий айримичилиқ әһвали көрүп чиқилиду. Җүмә күни хитайниң ирқий айримичилиқ әһвали музакиригә қоюлған. Йиғидин бурун дуня уйғур қурултийини өз ичигә алған 20 дин артуқ аммиви тәшкилат ирқий айримичилиқни түгитиш комитетиға доклат йоллап, хитайниң лагерлар мәсилисигә җаваб беришини тәләп қилған иди.

Ройтерс агентлиқиниң хәвәр қилишичә, ирқий айримичилиқни түгитиш комитетиниң әзаси гай мәкдогал сөз қилип, юқириқи бир милйондин башқа йәнә 2 милйондәк уйғур вә башқа мусулман милләтләрниң аталмиш "сиясий тәрбийиләш лагерлирида" идийә өзгәртишкә мәҗбурланғанлиқини тәкитлигән. Гай мәкдогал, комитет әзалири хитайниң "диний ашқунлуққа қарши туруш, иҗтимаий муқимлиқни қоғдаш намида уйғур аптоном районини йиғивелиш лагерлирини әслитидиған мәхпий лагерға айландурғанлиқи" ға даир нурғун хәвәрләрдин қаттиқ әндишә қилмақта" дегән. Лекин ройтерсниң хәвиридә тәкитлишичә, җүмә күнки йиғинда хитай вәкилләр өмики гай мәкдогалниң сөзигә һечқандақ инкас қайтурмиған. Мәкдогал йәнә хитайда уйғурлар вә башқа мусулманлар уларниң етник вә диний кимлики сәвәблик "дөләтниң дүшмини" муамилисигә учраватқанлиқини әскәртип, мисир вә түркийәдин хитайға қайтурулған 100 дин артуқ уйғур оқуғучиниң тутқун қилинғанлиқи, уларниң бәзилириниң тутқунда өлгәнликини тәкитлигән.

Йиғинда йәнә комитет әзаси фатима-бинта даһ, "бир милйондәк уйғурниң халиғанчә вә кәң көләмлик тутқун қилинғанлиқи" ни тәкитләп, хитай вәкилләр өмикигә "хитайдики уйғурларниң қанчилик диний әркинлики бар, уларниң диний ибадитини бәҗа кәлтүрүшигә қандақ қануни капаләт бар" дегән соални қойған. Мәзкур йиғин дүшәнбә күни йәнә давам қилиду.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт