Prézidént tramp ISIS ning rehbiri ebu bekir el-baghdadining öltürülgenlikini jakarlidi

Muxbirimiz erkin
2019-10-28
Élxet
Pikir
Share
Print

Amérika prézidénti tramp 27‏-öktebir aq sarayda muxbirlarni kütüwélip, amérika alahide heriket qisimlirining 26‏-öktebir küni süriyede élip barghan tuyuqsiz hujumida térrorluq teshkilati ISIS ning rehbiri ebu bekir el baghdadining öltürülgenlikini jakarlidi. "Washin'gton pochtisi" gézitining bildürüshiche, "5 Yil awwal özini musulmanlarning xelipisi, dep élan qilip, dunya miqyasida zorawanliqning qozghilishigha türtke bolghan el baghdadining öltürülüshi bösüsh xaraktérlik muhim weqe" iken.

Prézidént tramp axbarat yighinida, amérikaning dunyadiki 1‏-nomurluq térrorchiliq rehbiri ebu bekir el baghdadining öltürülgenlikini bildürgen. Prézidént trampning ilgiri sürüshiche, ISIS, yeni "Islam döliti" dunyadiki eng wehshi, eng zorawan térrorluq teshkilati bolup, amérikaning baghdadini izdewatqinigha nechche yil bolghan iken. U, el baghdadini tutush yaki öltürüsh uning dewride amérikaning tüp dölet bixeterlik wezipisige aylan'ghanliqini tekitligen. Uning ashkarilishiche, amérika alahide heriket qisimliri shenbe küni kechte gherbiy-shimaliy süriyede xeterlik we jesurane heriket élip bérip, özining wezipisini ongushluq tamamlighan. U, mezkur hujumda amérika alahide qisimlirining héchqandaq adem chiqimi tartmighanliqi, el baghdadining nurghun adimining uning bilen teng öltürülgenlikini bildürüp: "Tünügün axsham amérika we dunya üchün nahayiti zor kün boldi. Nurghun iztirap we ölümge seweb bolghan bir wehshi qatil, shiddetlik halda yoqitildi. U emdi bashqa bigunah kishilerge, ayallar we balilargha ziyankeshlik qilalmaydu. U itqa oxshash, qorqunchaqlarche öldi" dégen. 

Uning ashkarilishiche, el baghdadi 3 balisi bilen qoshup özini partilitiwalghan. Ebu bekir el baghdadi 2014‏-yili iraqning mosul shehride atalmish "Islam döliti" qurulghanliqini jakarlap, özini musulmanlarning xelipisi, dep élan qilghan, shundaqla dunyadiki musulmanlarni "Islam döliti" ge kélip qoshulushqa chaqirghan. Buning bilen dunyaning her qaysi jayliridiki radikal musulmanlar iraq we süriyege éqishqa bashlighanidi. Lékin, amérika awam palata re'isi nensi pélusi xanim amérikaning herbiy herikitige qayil bolghanliqini bildürüp, emma "Baghdadining ölüshi 'islam döliti' ning axirlashqanliqini bildürmeydu" dégen.

Toluq bet