Д у қ абдуләһәд дамолламниң өлүми һәққидә баянат елан қилди

Мухбиримиз шөһрәт һошур
2018.05.30
Share on WhatsApp
Share on WhatsApp

Бирқанчә күндин бери иҗтимаий таратқуларда хотән қарақашлиқ мәшһур диний зат абдуләһәд дамолламниң хитайниң йиғивелиш лагерида җан үзгәнлики һәққидә учурлар тарқалған иди.

Бу һәқтә ениқлаш елип барған дуня уйғур қурултийи алдуләһәд дамолламниң чәтәлдики уруқ-туғқанлири билән сөһбәтлишиш нәтиҗисидә дамолломниң өлүми һәққидики учурниң тоғрилиқини җәзмләштүргән. Бүгүн бу һәқтә мәхсус баянат елан қилған д у қ дуня җамаитини уйғур диярида мәвҗут болуп туруватқан йиғивелиш лагерлириниң хәвп-хәтирини һес қилишқа вә уларни тақаш үчүн тегишлик һәрикәт елип беришқа чақириқ қилди.

Инглизчә елан қилинған мәзкур баянатта абдуләһәд дамолламниң йиғивелиш лагерида өлгәнлики мәлум болған иккинчи бир диний алим икәнлики әскәртилгән. Алдинқи айларда “қуран кәрим” ни уйғур тилиға тәрҗимә қилған муһәммәт салиһ дамолламниң лагерда өлгәнлики хәвәр қилинған иди.

Д у қ ниң баянати вә иҗтимаий таратқуларда қәйт қилинишичә, 1930‏-йили қарақашта туғулған абдуәһәд дамоллам шәрқи түркистан инқилабиниң рәһбәрлиридин муһәммәд имин буғраниң җийәни болуп, у 1958-, 1979-, 2001-, 2004-, вә 2017‏-йили болуп, һаяти бойи җәмий 5 қетим тутқун қилинған. Дәсләпки қетимида 15 йиллиқ, кейинки қетимлирида 2 айдин 5 йилға қәдәр қамақ һаятини баштин кәчүргән абдуләһәд дамоллам ахирқи қетим, йәни өткән йили ноябирда лагерға елип кетилгән вә йеқинда лагерда җан үзгән.

Баянатта нәқил елинишичә, дуня уйғур қурултийиниң рәиси долқун әйса абдуләһәд дамолламниң һаяти бойи зулумға баш әгмигәнлики, уйғур әвладлириға исламниң һәқиқий маһийитини өгитиштә чиң турғанлиқи, мәрһумниң вапатиниң вәтән ичи-сиртидики уйғурларни чоңқур қайғуға чөмдүргәнликини тәкитлигән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.