Дуня уйғур қурултийи: “абдуҗелил супиниң тәқдиридин қаттиқ әндишә қиливатимиз”

Дуня уйғур қурултийи 27‏-сентәбир күни баянат елан қилип, әрәб бирләшмә хәлипиликидә из-дерәксиз йоқап кәткән абдуҗелил супиниң тәқдиридин қаттиқ әндишә қиливатқанлиқини билдүрди.

Чәтәл ахбарат васитилириниң хәвәр қилишичә, абдуҗелил супи өткән һәптә әрәб бирләшмә хәлипиликидики абдуллаһ бин равахаһ мәсчитидин намаз оқуп қайтишида 4 киши тәрипидин сорақсиз тутқун қилинип, аптомобилға селип елип кетилгән.

У тутқан қилинғанда аяли йенида болуп, аяли немә иш болғанлиқини сориған болсиму, лекин бу кишиләр һечқандақ чүшәнчә бәрмигән. Дуня уйғур қурултийи баянатида абдуҗелилниң хитайға қайтурулуш хәвпидә туруватқанлиқини агаһландуруп, әгәр у хитайға қайтурулса униң тутқун қилиниш вә тән җазасиға учриши мумкинликини тәкитлигән.

27 яшлиқ абдуҗелил супи әрәб бирләшмә хәлипиликиниң шарҗаһ шәһиридә туруватқан болуп, у 2017‏-йили 3‏-айда мисирдин қайтип кәлгәндин бери 3 йиллиқ рәсмий иқамәт билән туруватқан иди.

20‏-Сентәбир пуқрачә кийингән сақчилар тәрипидин тутқун қилинған абдуҗелил абдуллаһ бин равахаһ мәсчитидә мәзинлик қилатти.

Баянатта, дуня уйғур қурултийи рәиси долқун әйса: “биз йиллардин бери ундақ вәқәләрниң қайта-қайта йүз бериватқанлиқини көрүп кәлдуқ. Биз һечқачан ирадисигә хилап һалда қайтурулған уйғурларниң ақивити яхши болғанлиқини көрүп бақмидуқ” дегән. Долқун әйса йәнә “барлиқ һөкүмәтләр хитайниң бесимиға тиз пүтмәслики вә хәлқара қанунларға әмәл қилиши керәклики” ни тәкитлигән.

Абдуҗелил супи әрәб бирләшмә хәлипиликидә тутқун қилинғандин кейин из-дерәксиз йоқап кәткән бирдин-бир уйғур әмәс. Йеқинқи мәзгилләрдә дубәйдә тутқун қилинип, из -дерәксиз йоқап кәткән уйғурларниң сани хели бар. Йеқинда явропадики шиветсийә, германийә уйғур райониниң нөвәттики еғир вәзийитини көздә тутуп, уйғур мусапилирини хитайға қайтурушни тохтатқан. Хәлқара кишилик һоқуқ тәшкилатлири ислам әллириниңму бу дөләтләрни үлгә қилип, уйғурларни қайтурмаслиқини тәләп қилип кәлди.