Dunya Uyghur qurultiyi: "Abdujélil supining teqdiridin qattiq endishe qiliwatimiz"

Muxbirimiz erkin
2018-09-28
Élxet
Pikir
Share
Print

Dunya Uyghur qurultiyi 27‏-séntebir küni bayanat élan qilip, ereb birleshme xelipilikide iz-déreksiz yoqap ketken abdujélil supining teqdiridin qattiq endishe qiliwatqanliqini bildürdi.

Chet'el axbarat wasitilirining xewer qilishiche, abdujélil supi ötken hepte ereb birleshme xelipilikidiki abdullah bin rawaxah meschitidin namaz oqup qaytishida 4 kishi teripidin soraqsiz tutqun qilinip, aptomobilgha sélip élip kétilgen.

U tutqan qilin'ghanda ayali yénida bolup, ayali néme ish bolghanliqini sorighan bolsimu, lékin bu kishiler héchqandaq chüshenche bermigen. Dunya Uyghur qurultiyi bayanatida abdujélilning xitaygha qayturulush xewpide turuwatqanliqini agahlandurup, eger u xitaygha qayturulsa uning tutqun qilinish we ten jazasigha uchrishi mumkinlikini tekitligen.

27 Yashliq abdujélil supi ereb birleshme xelipilikining sharjah shehiride turuwatqan bolup, u 2017‏-yili 3‏-ayda misirdin qaytip kelgendin béri 3 yilliq resmiy iqamet bilen turuwatqan idi.

20‏-Séntebir puqrache kiyin'gen saqchilar teripidin tutqun qilin'ghan abdujélil abdullah bin rawaxah meschitide mezinlik qilatti.

Bayanatta, dunya Uyghur qurultiyi re'isi dolqun eysa: "Biz yillardin béri undaq weqelerning qayta-qayta yüz bériwatqanliqini körüp kelduq. Biz héchqachan iradisige xilap halda qayturulghan Uyghurlarning aqiwiti yaxshi bolghanliqini körüp baqmiduq" dégen. Dolqun eysa yene "Barliq hökümetler xitayning bésimigha tiz pütmesliki we xelq'ara qanunlargha emel qilishi kérekliki" ni tekitligen.

Abdujélil supi ereb birleshme xelipilikide tutqun qilin'ghandin kéyin iz-déreksiz yoqap ketken birdin-bir Uyghur emes. Yéqinqi mezgillerde dubeyde tutqun qilinip, iz -déreksiz yoqap ketken Uyghurlarning sani xéli bar. Yéqinda yawropadiki shiwétsiye, gérmaniye Uyghur rayonining nöwettiki éghir weziyitini közde tutup, Uyghur musapilirini xitaygha qayturushni toxtatqan. Xelq'ara kishilik hoquq teshkilatliri islam elliriningmu bu döletlerni ülge qilip, Uyghurlarni qayturmasliqini telep qilip keldi.

Toluq bet