Хитай һөкүмити афғанистанда һәрбий база қурмақчи болғанлиқини инкар қилди

Мухбиримиз ирадә
2018-01-25
Share

Бүгүн хитайниң дөләт мудапиә министирлиқи баянат елан қилип, «афғанистанда һәрбий база қурушни пиланлаватқанлиқимиз һәққидә чиққан хәвәрләр асассиз,» дегән.

Ройтерс агентлиқиниң хәвәр қилишичә, алдинқи һәптә русийәдики «фәрғанә» учур агентлиқи хәвәр тарқитип, хитайниң афғанистанда һәрбий база қурушни пиланлаватқанлиқини илгири сүргән. Бу хәвәр «дипломат» қатарлиқ башқа ахбарат васитилиридиму көчүрүп бесилған.

Һалбуки, хитай дөләт мудапиә министирлиқиниң баянатчиси ву чйән бүгүн бу һәқтики соалларға җаваб бәргәндә хитайниң бундақ бир пиланиниң йоқлиғини, бу һәқтики хәвәрләрниң асассиз икәнликини илгири сүргән.

Бултур мартта америкидики «армийә вақти» қатарлиқ бир қисим һәрбий хәвәр агентлиқлири хитай һәрбий қисимлириниң афғанистан һәрбий күчлири билән бирликтә афғанистанниң шәрқий учидики хитай билән чегрилинидиған вахан каридорида «террорлуққа қарши чарлаш» елип бериватқанлиқини хәвәр қилған иди. Шу чағдиму хитай тәрәп бу хәвәрни «ялған» дегән иди.

Ройтерс агентлиқи өз хәвиридә хитайниң узундин буян афғанистандики муқимсиз вәзийәтниң хитайниң ғәрбий чеграсидики уйғур аптоном райониға тәсир көрситишидин әнсирәп келиватқанлиқини, шуңа пакистан билән бу җәһәттә һәмкарлишишни сөзлишип кәлгәнликини баян қилған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт