Serwer danish: "Xitay hazir afghanistanning ishenchlik dosti!" dédi

Muxbirimiz eziz
2017-08-01
Share

Xitayning ghayet zor miqdarda meblegh sélip pütün küchi bilen yolgha qoyuwatqan "Bir belwagh bir yol qurulushi" ning bir muhim mezmuni xitaygha qoshna bolghan bir qisim döletlerni özige tartish boluwatqanliqi melum.

Yéqinda Uyghurlar diyaridiki birinchi nomurluq hoquqdar shexs chén chu'en'goning ürümchige ziyaretke kelgen afghanistanning mu'awin prézidénti serwer danish bilen uchrishishi bu nuqtini yene bir qétim gewdilendürdi.

"Tengritagh tori" ning xewirige qarighanda 30-iyul küni serwer danish bashchiliqidiki afghanistan wekiller ömiki ürümchige ziyaretke kélip, chén chu'en'go bashchiliqidiki xitay da'iriliri bilen mexsus söhbette bolghan.

Söhbette chén chu'en'go afghanistanni "Ishenchlik yaxshi qoshna" dep teripligen bolsa, serwer danish xitayni "Afghanistanning eng ishenchlik dosti" dégen hemde xitayning yillardin buyan afghanistanni qollap kelgenlikige teshekkür bildürgen. Ikki terep söhbet jeryanida nuqtiliq qilip xitayning "Bir belwagh bir yol qurulushi" üchün zörür bolghan "Térrorluqqa we 'üch xil küchler' ge qarshi küreshte zich hemkarlishish, shu arqiliq rayon bixeterlikige kapaletlik qilish" heqqide sözleshken.

Weziyet analizchiliri bu heqte pikir qilip, "Xitay bilen hindistan otturisida sürkilish boluwatqanda xitayning hindistan we özining qoshnisi afghanistan bilen qoyuq dost tartishi we hemkarliqni kücheytishi emeliyette 'bir chalmida ikki paxtek soqush' ni meqset qilghanliqi, afghanistanning bolsa pursettin paydilinip xitaydin téximu ünümlük menpe'etke érishishni meqset qilidighanliqi" ni otturigha qoyushti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet