Африқадики 16 дөләт вә бир тәшкилатниң хитайда турушлуқ дипломатлири уйғур диярида зиярәттә болған

Мухбиримиз сада
2019-09-18
Елхәт
Пикир
Share
Принт

Бурунди, уганда, лесото, җәнубий африқа, буркина фасо, конго, мозамбик, җибути, судан, зимбабве вә африқа иттипақи қатарлиқ 16 дөләт вә бир тәшкилатниң хитайда турушлуқ дипломатлири вә уларниң аяллири хитай һөкүмитиниң тәклипи билән уйғур дияриниң үрүмчи, турпан қатарлиқ җайлирини зиярәт қилған.

Шинхуа агентлиқиниң 18-сентәбирдики хәвиридин мәлум болушичә, депломатлар аввал турпан шәһири идиқут районидики кәспий техника тәрбийә мәркизидә зиярәттә болған. Бу җәрянда улар хитай һөкүмити йолға қойған «террорлуққа қарши күрәш» кә юқири баһа берип, районда йеқинқи 3 йил ичидә һечқандақ террорлуқ һуҗуминиң йүз бәрмигәнликиниң дәл бу хил күрәшниң иҗабий рол ойниғанлиқидин болғанлиқини ағзи-ағзиға тәгмәй махтиған. Шуниң билән бир вақитта улар йәнә «хитай даирилириниң бу тиришчанлиқлири ниң натоғра идийә билән юқумланған яшларни тоғра йолға башлиғанлиқи» ни мәдһийәлигән.

Хәвәрдә илгири сүрүлүшичә, 16 дөләтниң дипломатлири йәнә үрүмчидики «шинҗаң ислам институти» ниму көздин кәчүргән. Мәзкур институтниң мудири абдурәқип төмүрнияз дәрисликләрниң орунлаштурулуши, «оқуғучилар» ниң хизмәткә орунлишиш әһвали қатарлиқ җәһәтләрдә уларға чүшәнчә бәргән. Нәтиҗидә депломатлар хитай даирилириниң уйғурларға ислам динини өгиниш үчүн әвзәл шараитларни яритип бәргәнликигә болған мәмнунлуқини ипадә қилған һәмдә өзлириниңму буниңдин үлгә алидиғанлиқини билдүргән.

Бу йил июлда америка һөкүмити б д т кишилик һоқуқ алий кеңишиниң уйғур дияриниң вәзийити һәққидә сахта учур бәргүчиләр үчүн сәһнә һазирлап бәргәнликини қаттиқ әйиблигән иди. Әмдиликтә хитай һөкүмити йәнә африқадики 16 дөләт вә бир тәшкилатниң дипломатлирини уйғур диярида зиярәт қилдуруши хәлқараниң диққитини қозғиди.

Көзәткүчиләр бу хитай һөкүмитиниң хәларани алдаш үчүн номуссизларчә елип бериватқан тәтүр тәшвиқатиниң типик бир мисали, дәп көрсәтмәктә.

Пикирләр (0)
Share
Толуқ бәт